نو منتخب وزیر اعلیٰ بلوچستان سرفراز بگٹی کا کہنا ہے کہ حقوق بندوق سے نہیں پارلیمنٹ سے ملیں گے۔

اسمبلی اجلاس کے دوران وزیر اعلیٰ بلوچستان سرفراز بگٹی کا کہنا تھا کہ بلوچستان کو جوکچھ ملنا ہے وہ پارلیمنٹ سے ملنا ہے، حقوق بندوق سے نہیں پارلیمنٹ سے ملیں گے۔

انہوں نے کہا کہ حکومت ڈائیلاگ کرے گی اور باربار کرے گی، ریاستی رٹ کی عملداری پر کوئی سمجھوتہ نہیں ہوگا۔ آپ سب بلوچستان کی تقدیر بدلنے کے لئے میرا ساتھ دیں۔

سرفراز بگٹی کا کہنا تھا کہ جہاں دہشت گردی ہوگی، قانون کی بالادستی پرکوئی سمجھوتہ نہیں ہوگا جب کہ جہاں نوکریاں بکیں گی تو اس کا ذمہ دار لاہورمیں بیٹھا شخص نہیں، میں ہوں گا۔

وزیر اعلیٰ بلوچستان کہتے ہیں کہ جہاں جہاں تشدد ہوگا اس کے لیے ایک پلیٹ فارم بنائیں گے جب کہ تعلیمی شعبے میں ایمرجنسی نافذ کردی گئی ہے، گھوسٹ اسکولوں کو ٹھیک کرکے فعال کریں گے۔

وزیر اعلیٰ بلوچستان کا کہنا ہے کہ نوجوان بیروزگاری کی حالت میں ڈگریاں لے کر گھوم رہے ہیں، سب سے بڑا چیلنج گورننس کا ہے جب کہ دوسرا چیلنج دہشتگردی اور تیسرا موسمیاتی تبدیلی ہے۔

سرفراز بگٹی نے مزید کہا کہ بلوچستان میں صحت کے نظام کی بہتری کے لئے کام کریں گے،  پیپلزپارٹی نے ملک کو آئین دیا، ملک جن بحرانوں کا شکار ہے اس سے پیپلزپارٹی ہی نکال سکتی ہے۔ جنہوں نے اعتماد کا ووٹ دیا ان کا شکر گزار ہوں۔