سعودی عرب میں اس رمضان المبارک میں اب تک 80 لاکھ سے زائد افراد عمرہ ادا کرچکے یا کرنے کی نیت سے موجود ہیں اور اس ماہ کے اختتام تک یہ تعداد مزید اور تیزی کے ساتھ بڑھے گی۔

سعودی حکام کی جانب سے فراہم کردہ اعداد و شمار کے مطابق رمضان المبارک کے آغاز سے اب تک بیرون ملک سے 82 لاکھ 35 ہزار 680  افراد عمرہ کرنے  کے لیے آئے۔

ان میں سے 72 لاکھ 59 ہزار 504 افراد عمرہ ادا کرچکے ہیں جبکہ 9 لاکھ 76 ہزار 176 افراد ابھی عمرہ ادا کرنے کے لیے سعودی عرب میں موجود ہیں۔

 رواں رمضان المبارک کے پہلے عشرے کے دوران تقریباً  ایک کروڑ کے قریب زائرین مسجد نبوی آئے جبکہ ساڑھے 7 لاکھ کے قریب خوش نصیب افراد نے روضہ رسولﷺ پر حاضری دی۔

رمضان المبارک کے دوران مسجد نبوی آنے والے زائرین کے لیے یومیہ 4 لاکھ لیٹر آب زم زم فراہم کیا جارہا ہے۔

اس دوران زائرین میں آب زمزم کی ایک لاکھ 95 ہزار 800 بوتلیں تقسیم کی گئیں اور 29 لاکھ 8 ہزار 530 افطار پیکٹس روزے داروں میں تقسیم کیے گئے۔