روسی صدر ولادیمیر پیوٹن نے دوبارہ صدر منتخب ہوتے ہی مغربی رہنماؤں کو تیسری جنگ عظیم سے خبردار کیا ہے۔

بین الاقوامی خبررساں ادارے کے مطابق پانچویں مرتبہ روسی صدر منتخب ہونے والے ولادیمیر پیوٹن نے مغربی ممالک کو خبردار کرتے ہوئے کہا کہ یوکرین میں مغربی افواج کی موجودگی اور نیٹو کی مداخلت دنیا کو تیسری عالمی جنگ کے دہانے پر دھکیل سکتی ہے۔

ان کا کہنا تھا کہ میری جیت روس کومضبوط بنادے گی، روس کوسوچنےکی ضرورت ہے کہ یوکرین میں امن  کے لیے کس سے بات کی جاسکتی ہے کیونکہ  یوکرین میں امن سے متعلق بات چیت  کے لیے یوکرینی صدر آپشن نہیں ہیں۔

پیوٹن کا کہنا تھا کہ امریکہ سمیت مغرب میں کوئی جمہوریت نہیں، روس میں انتخابی نظام امریکہ سے زیادہ شفاف ہے۔

روسی صدر نے کہا کہ یوکرین میں اسپیشل آپریشن کےاہداف حاصل کرنے  کے لیے ہر ممکن کوشش کریں گے۔

انہوں نے  مزید کہا کہ اگر حملے جاری رہتے ہیں اور روس کے دفاع  کے لیے ضرورت پیش آئی تو خارکیف ریجن کے علاوہ بھی وسیع یوکرینی علاقے پر مشتمل بفر زون بنائیں گے۔

واضح رہےکہ روس میں ہونے والے صدارتی انتخابات میں صدر ولادیمیر پیوٹن 87 فیصد ووٹوں کے ساتھ پانچویں مرتبہ روس کے صدر منتخب ہوچکے ہیں۔