امریکی صدر  جو بائیڈن نے غزہ میں امداد پہنچانے کے لیے عارضی بندرگاہ قائم کرنے کا اعلان کردیا۔

بین الاقوامی خبررساں ادارے کے مطابق امریکی صدر جوبائیڈن نے جمعرات کو اسٹیٹ آف دی یونین سے اپنے آخری خطاب میں بندرگاہ کے قیام کا باضابطہ اعلان کیا۔

جوبائیڈن نے کہا کہ امریکی فوج غزہ میں مزید امداد کی فراہمی کے لیے عارضی بندرگاہ قائم کرے گی۔

ان کا کہنا تھا کہ اس اقدام میں غزہ میں موجود امریکی فوجی شامل نہیں ہوں گے تاہم اس عارضی بندرگاہ پر جہازوں کے ذریعے امداد کنارے تک پہنچائی جائے گی۔

بائیڈن کا یہ اعلان ایسے وقت میں سامنے آیا ہے جب وہ اپنی ڈیموکریٹک پارٹی کے بہت سے لوگوں کے غصے کو ٹھنڈا کرنے کی کوشش کر رہے ہیں جو کہ ان کے 7 اکتوبر سے غزہ میں جاری اس جارحیت میں اسرائیل کی حمایت پر ہے۔

واضح رہے کہ غزہ میں اسرائیلی جارحیت میں اب تک 30 ہزار سے زائد فلسطینی شہید ہوچکے ہیں جن میں نصف سے زائد بچے اور خواتین شامل ہیں۔

غزہ میں زخمی ہونے والوں کی تعداد بھی 70 ہزار سے تجاوز کرچکی ہے اور ہزاروں مکانات وعمارتیں مکمل طور پر تباہ ہوچکی ہیں۔