نیشنل انجینئرنگ سروسز آف پاکستان(نیسپاک) نے کرکٹ اسٹیڈیمز کی اپ گریڈیشن کا منصوبہ پیش کر دیا۔

تفصیلات کے مطابق چیئرمین پی سی بی محسن نقوی نے نیسپاک کے حکام سے ملاقات کی جس میں پاکستان کے تین بڑے کرکٹ اسٹیڈیمز کی اپ گریڈیشن کے حوالے سے تبادلہ خیال کیا گیا۔

اجلاس میں سی او او پی سی بی سلمان نصیر، ڈائریکٹر انفراسٹرکچر پی سی بی ناصر حمید اور جی ایم نیسپاک بھی موجود تھے۔

قذافی اسٹیڈیم لاہور، نیشنل بینک اسٹیڈیم کراچی اور پنڈی اسٹیڈیم راولپنڈی کی فوری اپ گریڈیشن کے ابتدائی ڈیزائن چیئرمین پی سی بی کو پریزنٹیشن کی صورت میں پیش کیے گئے۔

چیئرمین نے حکام کو اسٹیڈیم کی ہر نشست سے شائقین کے لئے ویو بڑھانے کے حوالے سے اپنے منصوبوں کے بارے میں ہدایت کی جبکہ انہوں نے تینوں مقامات پر مہمان نوازی کے خانوں کی تزئین و آرائش کی اہمیت پر بھی زور دیا۔

اپ گریڈیشن پلان کو جلد حتمی شکل دے دی جائے گی، چیئرمین نے نیسپاک حکام کو ہدایت کی کہ آئی سی سی چیمپیئنز ٹرافی 2025 کی میزبانی سے قبل وقت کی تنگی کو مدنظر رکھتے ہوئے اسٹیڈیمز پر فوری طور پر کام شروع کیا جائے۔