وزیراعظم شہباز شریف سے وزیراعلی خیبر پختونخواہ علی امین گنڈا پور نے وزیراعظم ہاؤس میں اہم ملاقات کی، یہ دونوں رہنماؤں کے درمیان پہلی ملاقات تھی۔

وزیراعظم شہباز شریف سے ملاقات میں وزیراعلیٰ کے پی نے خیبر پختونخواہ میں نئے چیف سیکرٹری کا مطالبہ کر دیا، علی امین گنڈا پور نے شہاب علی شاہ کی بطور چیف سیکرٹری تعیناتی کا مطالبہ کردیا۔

ملاقات کے دوران وزیراعلی خیبر پختونخوان نے وزیراعظم شہباز شریف سے دوسرے صوبوں کی طرح خیبر پختونخواہ کو بھی فنڈذ دینے اور صوبے کے 1500 ارب روپے کے واجبات کلیئر کرنے کا مطالبہ کردیا۔

بعد ازاں وفاقی وزیر احسن اقبال کے ہمراہ میڈیا سے گفتگو کرتے ہوئے وزیراعلیٰ خیبرپختونخوا نے کہا کہ آج وزیراعظم سے پہلی ملاقات ہوئی، وزیراعظم سے ملاقات مثبت رہی، ملاقات میں صوبے کی صورتحال پر بات ہوئی۔

علی امین گنڈاپور کا کہنا تھا کہ وزیراعظم نے بھرپورتعاون کی یقین دہانی کرائی ہے، بات چیت ہوگی تو سیاسی معاملات بھی بہتر ہوں گے، وزیراعظم نے کے پی کے واجبات کی ادائیگی کا کہا ہے۔

ایک سوال کے جواب میں وزیراعلیٰ خیبرپختونخوا نے کہا کہ معاشی صورتحال کو دیکھ کرہی مطالبات کریں گے، معاشی صورتحال کا پتا ہے اس لیے ایساکوئی مطالبہ نہیں کریں گے، یہ موقف نہیں تھا کہ آئی ایم ایف پاکستان کو فنڈزفراہم نہ کرے، موقف تھا انتخابات میں دھاندلی کی تحقیقات ہوں۔

دوسری جانب وفاقی وزیر احسن اقبال کا کہنا تھا کہ سیاست اپنی اپنی لیکن ریاست سانجھی ہے، سیاست کرتے رہیں گے لیکن ملک کےلیے خطرات کا ملکرمقابلہ کرنا ہے۔

انہوں نے کہا کہ وزیراعظم نے وزارت خزانہ افسران کو ہدایت کی واجبات کامسئلہ حل کریں، وزیراعظم نے یقین دلایا ہے کے پی حکومت کے واجبات ادا کیے جائیں گے جب کہ آئی ایم ایف مذاکرات کے بعد کے پی واجبات کےمسائل حل کیے جائیں گے۔

ایک سوال کے جواب میں احسن اقبال نے کہا کہ لوڈشیڈنگ کا مسئلہ بھی وزیراعلیٰ خیبرپختونخوا نے اٹھایا ہے، سحری،افطاری میں لوڈشیڈنگ کامسئلہ بھی وزیراعلیٰ نےاٹھایا، وزیراعلیٰ خیبرپختونخوا نے قیدیوں سےمتعلق بھی گفتگو کی۔