کانگریس رہنما راہول گاندھی کا کہنا ہے کہ پاکستان کے مقابلے بھارت میں بے روزگاری  کی شرح دوگنی ہے۔

بھارتی میڈیا کی رپورٹ کے مطابق  کانگریس رہنما راہول گاندھی نے مودی سرکار کی ناکام پالیسیوں پر کڑی تنقید کرتے ہوئے بھارتی وزیر اعظم مودی کے خلاف بڑا دعویٰ کردیا۔

راہول گاندھی نے کہا کہ نریندر مودی کے نوٹ بندی اور اشیاء پر جی ایس ٹی کے نفاذ نے چھوٹے کاروباروں کو ختم کردیا ہے۔ مودی کی پالیسیوں کی وجہ سے بھارت میں بنگلہ دیش، بھوٹان اور پاکستان سے زیادہ بے روزگاری ہے۔

انہوں نے کہا کہ پاکستان کے مقابلے بھارت میں بے روزگاری دوگنی ہے جبکہ ہمارے پاس بنگلہ دیش اور بھوٹان سے زیادہ بے روزگار نوجوان ہیں۔

کانگریس رہنما نے کہا کہ آج ملک میں گزشتہ 40 سالوں میں سب سے زیادہ بے روزگاری ہے۔

راہول گاندھی نے یہ بھی دعویٰ کیا کہ حکومت انڈین ریلوے کی پالیسیاں امیر لوگوں کو ذہن میں رکھ کر بنا رہی ہے۔ دوسرے طبقے کے لوگ ان سب پالیسیوں سے محروم ہیں۔