انسداد دہشتگری عدالت اسلام آباد نے علی امین گنڈا پورکی ضمانت قبل از گرفتاری کی در خواست منظورکرلی۔

تفصیلات کے مطابق اسلام آباد کی انسدادِ دہشت گردی کی عدالت میں وزیراعلٰی خیبرپختون خوا علی امین گنڈاپورکی ضمانت قبل از گرفتاری کی درخواست پر سماعت ہوئی۔

 وکیل راجہ ظہورِ الحسن نے مؤقف پیش کیا کہ علی امین گنڈاپور ایف آئی آر میں نامزد ہیں مگر ان کا کردار کوئی نہیں۔ علی امین گنڈاپور موقع پر موجود ہی نہیں تھے۔

وکیل راجہ ظہورِ الحسن نے مؤقف اپنایا کہ علی امین گنڈاپور کے خلاف پچاس ایف آئی آر درج ہوئیں۔ علی امین گنڈاپور کو عدالت تک پہنچنے بھی نہیں دیا جاتا رہا۔

عدالت نے کہا کہ پچاس ہزار روپے کی شورٹی جمع کروا دیں۔

عدالت نے علی امین گنڈا پور کی ضمانت قبل از گرفتاری کی در خواست 17 اپریل تک منظورکرلی۔

دوسری جانب ڈسٹرکٹ اینڈ سیشن کورٹ اسلام آباد میں علی امین گنڈاپور تھانہ گولڑہ میں درج مقدمہ میں ایڈیشنل سیشن جج عبدالغفور کاکڑ کی عدالت میں پیش ہوئے۔

علی امین گنڈا پورکے وکیل کی جانب سے وارنٹ گرفتاری منسوخ کیے جانے کی استدعا کرتے ہوئے وکیل راجہ ظہورالحسن نے کہا کہ علی امین گنڈاپور الیکشن مصروفیات کے باعث عدالت میں پیش نہیں ہو سکے۔

عدالت نے علی امین گنڈاپورکے وارنٹ گرفتاری منسوخ کرتے ہوئے تھانہ گولڑہ میں درج مقدمے کی سماعت 17 اپریل تک ملتوی کر دی۔