سابق کپتان شاہد آفریدی نے محمد عامر اور عماد وسیم کا ریٹائرمنٹ واپس لینے کا فیصلہ درست قرار دے دیا۔

سابق کپتان شاہد آفریدی نے محمد عامر اور عماد وسیم کا ریٹائرمنٹ واپس لینے کا فیصلہ درست قرار دیتے ہوئے کہا کہ دونوں سینئر تجربہ کار کھلاڑی ہیں، نوجوان کرکٹرز کو ان سے سیکھنے کو ملے گا۔

میڈیا سے گفتگو میں شاہد آفریدی نے کہا کہ کاکول میں میرا اچھا تجربہ رہا ہے فٹنس پر کافی فرق پڑتا ہے۔ کھلاڑیوں کو اگر کاکول میں ایک مہینے کا کیمپ ملے تو وہ سپر مین بن کر نکلیں گے۔

ان کا کہنا تھا کہ چیئرمین پی سی بی نے سلیکشن کمیٹی کو با اختیار بنایا ہے جو اچھی چیز ہے۔ تاہم سلیکشن کمیٹی کا سربراہ ضرور ہونا چاہیے تھا۔

علاوہ ازیں سابق کپتان نے سوشل میڈیا پر تنقید کا جواب دیتے ہوئے کہا کہ آپس میں نفرت پھیلانا اچھی بات نہیں۔

خیال رہے کہ آل راؤنڈر عماد وسیم اور فاسٹ بولر محمد عامر نے حال ہی میں بین الاقوامی کرکٹ سے ریٹائرمنٹ کا فیصلہ واپس لیا تھا۔