آج ہم آپ کو بتائیں گے کہ فائنل سے قبل پی ایس ایل 9 میں سب سے زیادہ چھکے، رنز اور وکٹیں لینے والے کھلاڑی کون ہیں۔

پاکستان سپر لیگ (پی ایس ایل) سیزن 9 کی فائنلسٹ ٹیموں کا فیصلہ ایلیمینیٹر 2 میں اسلام آباد یونائیٹڈ اور پشاور زلمی کے درمیان میچ کے بعد ہوا۔

اس میچ میں اسلام آباد یونائیٹڈ کی فتح حاصل کے بعد ملتان سلطانز سے فائنل ٹاکرا آج رات 9 بجے کراچی کے نیشنل اسٹیڈیم میں کھیلا جائے گا۔

اسلام آباد یونائیٹڈ 2018 کے بعد فائنل تک رسائی حاصل کرنے میں کامیاب رہی ہے جب کہ ملتان سلطانز مسلسل چوتھی مرتبہ فائنل میں پہنچی ہے۔

سب سے زیادہ رنز بنانے والے کھلاڑی

اگر ہم کھلاڑیوں کی کارکردگی پر نظر ڈالیں تو اب تک پشاور زلمی کے کپتان بابر اعظم سب سے زیادہ رنز بنانے والے کھلاڑیوں کی فہرست میں پہلے نمبر پر موجود ہیں۔

بابر اعظم 11 اننگز میں 569 رنز بنانے میں کامیاب رہے ہیں لیکن پھر بھی وہ فخر زمان کا ریکارڈ توڑنے میں ناکام رہے ہیں جو اب تک پی ایس ایل کی تاریخ میں 588 رنز کے ساتھ سب سے زیادہ رنز بنانے والے کھلاڑی ہیں۔

رواں پی ایس ایل میں سب سے زیادہ رنز بنانے والے کھلاڑیوں میں بابر اعظم پہلے، محمد رضوان 11 اننگز میں 381 رنز کے ساتھ دوسرے، عثمان خان 6 اننگز میں 373 رنز کے ساتھ تیسرے نمبر موجود ہیں۔

علاوہ ازیں رسی وین ڈر ڈسن 7 اننگز میں 364 رنز بناکر چوتھے نمبر پر موجود ہیں جب کہ صائم ایوب 11 اننگز میں 345 رنز کے ساتھ پانچویں نمبر پر موجود ہیں۔

سب سے زیادہ وکٹیں لینے والے بولر

اگر ہم بولنگ کے شعبہ کی بات کریں تو اسامہ میر 23 وکٹیں لے کر پہلے نمبر پو موجود ہیں جب کہ محمد علی 18 وکٹوں کے ساتھ دوسرے اور ابرار احمد 16 وکٹوں کے ساتھ تیسرے نمبر پر موجود ہیں۔

چوتھے نمبر پر ویسٹ انڈیز کے کھلاڑی عقیل حسین 15 وکٹوں کے ساتھ موجود ہیں جب کہ پانچویں نمبر پر ڈیوڈ ولی 14 وکٹیں حاصل کرنے میں کامیاب رہے ہیں۔

سب سے زیادہ چھکے لگانے والے کھلاڑی

پی ایس ایل 9 میں اب تک صائم ایوب نے سب سے زیادہ 21 چھکے لگائے ہیں جب کہ دوسرے نمبر پر رسی وین ڈر ڈوسن نے 16 اور تیسرے نمبر پر کیرون پولارڈ نے 15 چھکے لگائے ہیں۔

سعود شکیل  10 اننگز میں 15 چھکے لگاکر چوتھے نمبر پر موجود ہیں جب کہ محمد رضوان نے  11 اننگز میں 15 چھکے لگائے ہیں جو پانچویں نمبر پر موجود ہیں۔