پاکستان سپر لیگ سیزن 9 کے میچ میں پشاور زلمی نے کوئٹہ گلیڈی ایٹرز کو 76 رنز سے شکست دے دی۔

تفصیلات کے مطابق پی ایس ایل 9 کے 25 میچ میں راولپنڈی کرکٹ اسٹیڈیم میں کوئٹہ گلیڈی ایٹرز کی پوری ٹیم 197 رنز کے ہدف کے تعاقب میں 17.5 اوورز میں 120 رنز بنا کر آؤٹ ہو گئی۔

کوئٹہ کے جیسن رائے نے 16 اور سعود شکیل نے 24 رنز بنائے، عقیل حسین نے 14 اور محمد عامر نے 13 رنز بنائے۔

پشاور زلمی کی جانب سے صائم ایوب، لوک ووڈ، مہران ممتاز اور خرم شہزاد نے 2،2 کھلاڑیوں کو آؤٹ کیا جبکہ عامر جمال اور نوین الحق نے ایک ایک کھلاڑی کو آؤٹ کیا۔

اس سے قبل کوئٹہ گلیڈی ایٹرز نے ٹاس جیت کر پشاور زلمی کو پہلے بیٹنگ کی دعوت دی۔

صائم ایوب نے 30 اور بابر اعظم نے برق رفتار 53 رنز کی اننگ کھیلی، کیڈ مور 33، محمد حارث 20 اور رؤمن پاول نے 28 رنز بنائے۔

کوئٹہ گلیڈی ایٹرز کے عقیل حسین نے پی ایس ایل سیزن 9 کی پہلی ہیٹ ٹرک کی انہوں نے 16 اوور میں عامر جمال، مہران ممتاز اور لوگ ووڈ کو اپنا نشانہ بنایا۔

عقیل حسین نے 23 رنز دے کر 4 وکٹیں حاصل کی، جبکہ ابرار احمد، محمد حسنین اور سہیل خان نے 1،1 کھلاڑی کو آؤٹ کیا۔