احسان اللہ علاج کیلیے انگلینڈ جائیں گے، مداحوں سے دعاؤں کی درخواست
قومی ٹیم کے فاسٹ بولر احسان اللہ کچھ دنوں میں علاج کے لیے انگلینڈ جائیں گے اور انہوں نے مداحوں سے دعاؤں کی درخواست کردی۔
پاکستان سپر لیگ میں نمایاں کارکردگی دکھانے کے بعد قومی ٹیم میں جگہ بنانے والے فاسٹ بولر احسان اللہ اگلے چند روز میں علاج کے لیے انگلینڈ جائیں گے، اس سلسلے میں پاکستان کرکٹ بورڈ نے فاسٹ بولر کے انتظامات مکمل کیے ہیں۔
پی ایس ایل فرنچائز ملتان سلطانز بھی اس سلسلے میں تعاون کر رہی ہے، احسان اللہ کہنی کی تکلیف سے سرجری کے باوجود مکمل نجات نہیں پا سکے اور وہ ری ہیب کے باوجود تکلیف کا شکار ہیں۔
احسان اللہ کے انگلینڈ میں معائنے کے بعد سرجری ہو گی۔
فاسٹ بولر نے اپنے ایک پیغام میں فینز کو عید کی مبارکباد دی ہے اور کہا ہے کہ میں سرجری کے لیے انگلینڈ جا رہا ہوں ، میرے لیے دعا کریں کہ میں جلد فٹ ہو جاؤں۔
اس سے قبل پاکستان سپر لیگ کی فرنچائز ملتان سلطانز کے مالک علی ترین نے کہا کہ احسان اللہ کی کہنی کی انجری کی غلط تشخیص کی گئی جس کی وجہ سے ان کی سرجری ناکام ہوئی۔
انہوں نے کہا کہ ملتان سلطانز نے کہنی کی انجری کے باوجود احسان اللہ کو پی ایس ایل 9 میں ریٹین کیا جس کا مقصد ملتان سلطان کے فیزیو، اسٹرینتھ کنڈیشننگ کوچ کے ساتھ کام کرنا تھا۔
علی ترین نے بتایا کہ احسان اللہ کو رواں ماہ انگلینڈ بھیج رہے ہیں، جہاں ماہر سرجن ان کا معائنہ کریں گے۔
بعد ازاں پاکستان کرکٹ بورڈ (پی سی بی) کے ڈائریکٹر میڈیکل اینڈ اسپورٹس سائنسز ڈاکٹر سہیل سلیم نے کہا ہے کہ فاسٹ بولر احسان اللہ کی پی سی بی نے غلط تشخیص نہیں کی اور نہ انہیں تنہا چھوڑا ہے بلکہ احسان اللہ کی کہنی کی ایم آر آئی رپورٹ کی غلط تشریح کی گئی تھی۔
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News