داعش کے سوشل میڈیا اکاؤنٹ سے چمپئینز فٹ بال لیگ کو نشانہ بنانے کی دھمکی نے منتظمین کو پریشانی میں مبتلا کر دیا ہے۔

اسلامک اسٹیٹ گروپ کی حمایت کرنے والے ایک میڈیا ادارے کی جانب سے مقامات کے خلاف دھمکیاں شائع کرنے کے بعد رواں ہفتے چیمپئنز لیگ کے میچوں کی سیکیورٹی بڑھا دی جائے گی۔

فرانس اور اسپین دونوں ممالک کے وزراء نے بھی حفاظتی اقدامات میں اضافے کی تصدیق کی ہے۔

داعش کے حامی ایک میڈیا چینل نے منگل اور بدھ کو کوارٹر فائنل میچوں کی میزبانی کرنے والے اسٹیڈیمز کی متعدد تصاویر شائع کی ہیں۔

یوئیفا کا کہنا ہے کہ وہ ان خطرات سے آگاہ ہے لیکن میڈرڈ، پیرس اور لندن میں ہونے والے میچز شیڈول کے مطابق ہوں گے۔

فرانس کے وزیر داخلہ گرالڈ ڈارمینن نے کہا ہے کہ بدھ کو پیرس میں پی ایس جی اور بارسلونا کے درمیان ہونے والے میچ کے موقع پر سکیورٹی کے سخت انتظامات کیے جائیں گے۔

وزیر داخلہ گرالڈ ڈارمینن نے کہا کہ میں آپ کو یاد دلاتا ہوں کہ صرف 10 روز قبل داعش نے میونخ اسٹیڈیم کی ایک تصویر شیئر کی تھی اور کہا تھا کہ فٹ بال کے کھیلوں کی میزبانی کرنے والے کھیلوں کے مقامات کے خلاف کارروائی کی جانی چاہیے۔

انہوں نے مزید کہا کہ حالانکہ تمام کھیلوں کو نشانہ بنایا جا سکتا ہے لیکن یہ دیکھتے ہوئے کہ چیمپئنز لیگ فٹ بال کے لیے کتنی اہم ہے، ہم یقینا اپنے شراکت داروں سے بات کر رہے ہیں۔

اس ہفتے میڈرڈ میں دو کوارٹر فائنل کھیلے جائیں گے۔ ریال میڈرڈ منگل کو مانچسٹر سٹی کی میزبانی کرے گا جبکہ بدھ کو ایٹلیٹیکو میڈرڈ کا مقابلہ بوروسیا ڈورٹمنڈ سے ہوگا۔