وزیر اعلیٰ پنجاب مریم نواز کی زیر صدارت مری میں خصوصی اجلاس منعقد کیا گیا۔

تفصیلات کے مطابق مری میں وزیر اعلیٰ پنجاب مریم نواز کی زیر صدارت صوبے بھر میں امن و امان کی مجموعی صورتحال پر خصوصی اجلاس منعقد کیا گیا۔

اجلاس میں آئی جی پولیس نے صوبے میں مجموعی صورت حال پر وزیر اعلیٰ پنجاب کو بریفنگ دی۔

اجلاس میں آرگنائزڈ اور سائبر کرائم کے خاتمے کے لیے اسپیشل یونٹ کا اصولی فیصلہ کیا اور عوام کے جان و مال کے تحفظ کے لیے تجاویز اور سفارشات پیش کی گئیں۔

خصوصی اجلاس میں پولیس میں غیرپیشہ ورانہ رویے کی نشاندہی کے لیےآڈٹ سسٹم نافذ کرنے کی بھی منظوری دی گئی۔

اجلاس میں بتایا گیا کہ رشوت مانگنے پر سی ایم کے اسپیشل ڈیش بورڈ پرشکایت درج ہو سکے گی۔

پنجاب پولیس میں ہر کرائم کے لیے فنکشنل اسپیشلائزڈ فورس قائم کرنےکا اصولی فیصلہ کیا گیا اور منشیات کےخاتمےکےلیےمہم مسلسل جاری رکھنےکی منظوری دی گئی۔

اجلاس میں عورتوں اور بچوں سے زیادتی کے مقدمات میں سزائے موت کے لیے قانون سازی کا بھی فیصلہ کیا گیا۔

اجلاس میں ناجائز اسلحہ کلچر کے خاتمے کے لیے اقدامات کی ہدایت کی گئی اور قوانین میں ترمیم کا فیصلہ کیا گیا، جبکہ پتنگ بازی اور دھاتی تار کے سدباب کے لیے فول پروف انتظامات کا حکم دیا گیا۔

وزیر اعلیٰ پنجاب نے کہا کہ سزا یقینی بنا کر جرائم میں کمی یقنی بنائی جاسکتی ہے، انہوں نے آئی جی پنجاب کو ہدایت کی کہ زیادتی کے مقدمات میں ملوث افراد کو کیفرکردار تک پہنچایا جائے۔

اجلاس میں وزیر اعلیٰ کا کہنا تھا کہ ہر شہری کا تحفظ حکومت کی بنیادی ذمہ داری ہے۔

وزیر اعلیٰ پنجاب مریم نواز شریف نے مزید کہا کہ دہشتگردی، اسمگلنگ کے مستقل خاتمے کے لیے موثرکارروائی یقینی بنائی جائے اور پراسکیوشن اورانوسٹی گیشن سسٹم میں بہتری کی ضرورت ہے۔