قومی اسمبلی میں قائد حزب اختلاف کے تقرر کا مرحلہ مکمل ہو گیا، عمر ایوب خان اپوزیشن لیڈر مقررکردیے گئے۔

تفصیلات کے مطابق اسپیکر قومی اسمبلی نے عمرایوب سمیت آزاد اراکین کے گروپ کو اپنے چیمبر میں بلایا تھا۔ اسپیکر قومی اسمبلی سردار ایاز صادق سے اپوزیشن کے اراکین بیرسٹرگوہرعلی خان، عمرایوب اور ملک محمد عامر ڈوگر نے ملاقات کی۔

ملاقات میں قائد حزب اختلاف کی نامزدگی کے حوالے سے تبادلہ خیال کیا گیا اورقائد حزب اختلاف کے لیے عمر ایوب کا نام اپوزیشن کی طرف سے جمع کروایا گیا تھا۔

اسپیکر قومی اسمبلی نے قومی اسمبلی کے رولز آف پروسیجر اینڈ کنڈکٹ آف بزنس کے رول 39 کے تحت اسکروٹنی کا عمل مکمل ہونے کے بعد عمر ایوب کو قائد حزب اختلاف ڈیکلیئرکیا۔

عمرایوب کا نام اپوزیشن کی اکثریت کی طرف سے پیش کیا گیا تھا۔ اپوزیشن لیڈر کی نامزدگی کیلئے کاغذات جمع کرنے کا وقت کل مؤرخہ یکم اپریل 2024 کو شام 6 بجے تک تھا۔

مقرر وقت تک کسی دوسرے امیدوار کے کاغذات موصول نہیں ہوئے۔

بعدازاں اپوزیشن لیڈرعمر ایوب خان نے اپوزیشن لیڈر کا چیمبر سنبھال لیا۔ اپوزیشن لیڈرعمرایوب خان کو عملے نے پھول پیش کیے۔