پشاور: 15 سوارب روپے بیرون قرضوں میں ڈوبے صوبے کی شاہ خرچیوں کی ایک اور سمری سامنے آگئی۔ 

سرکاری دستاویز کے مطابق خیبرپختونخوا میں پابندی کے باوجود بھی وزراء کے تنخواؤں، مراعات اور الاونس بل میں ترمیم کرکے اضافہ کرنے کا فیصلہ کیا گیا ہے۔

ذرائع نے بتایا ہے کہ صوبائی وزراء ،مشیر اور معاونین مراعات بل کی سمری تیار کرکے ترمیم کے لئے متعلقہ محکمے کو ارسال کردی گئی ہیں۔

دستاویز میں بتایا گیا کہ وزراء ،مشیر اور معاونین خصوصی کو دی جانے والی ہاوس رینٹ، سبسڈی اورمرمت میں اضافہ کیا جائے گا۔

دستاویز میں یہ بھی بتایا گیا کہ مہنگائی کے باوجود بھی 2014 سے اب تک وزراء کے ہاوس رینٹ، سبسڈی اور رہائش کی مرمت کے لیے مختص بجٹ میں اضافہ نہیں کیا گیا۔

دستاویز کے مطابق  وزراء ،مشیر اور معاونین خصوصی کی رہائش کی مرمت پر 5 لاکھ کی جگہ 10 لاکھ روپے خرچ کرنے کی اجازت دی جائے جب کہ سرکاری گھر نہ ہونے کی صورت میں کرایہ کے گھر کے لیے کرایہ کو 70 ہزار سے 2 لاکھ روپے ماہانہ کیا جائے۔

دستاویز میں مزید بتایا گیا کہ وزیر،مشیر اور معاونین خصوصی کی ہاوس سبسڈی بھی 70 ہزار سے بڑھا کر 2 لاکھ روپے کی جائے گئی، رہائش کی مرمت میں 5 لاکھ اور کرایہ میں 1 لاکھ 30 ہزار روپے کا اضافہ کرنے کی سمری تیار کی گئی ہے، بل میں ترمیم کرکے منظوری کے لئے اسمبلی میں پیش کیا جائے گا۔