پاکستان ویمن کرکٹ ٹیم کی سابق کپتان بسمہ معروف اور غلام فاطمہ کار حادثے میں زخمی ہوگئیں۔

تفصیلات کے مطابق کراچی میں جاری قومی ویمن کرکٹ ٹیم کے تربیتی کیمپ میں شریک دو پلیئرز بسمہ معروف اور غلام فاطمہ کار حادثے میں زخمی ہوگئیں۔

پاکستان کرکٹ بورڈ (پی سی بی) کی جانب سےجاری بیان میں کہا گیا ہے کہ دونوں کھلاڑیوں کو ابتدائی طبی امداد فراہم کر دی گئی ہے اور خطرے کی کوئی بات نہیں ہے۔

پی سی بی کا کہنا ہے کہ جمعہ کی شب پیش آنے والے ٹریفک حادثے میں 32 سالہ آل راؤنڈر بسمہ معروف اور 28 سالہ رائٹ آرم لیگ اسپنر غلام فاطمہ کو معمولی زخم آئے۔

ذرائع کا کہنا ہے کہ دونوں کرکٹرز کراچی میں مقیم ایک ساتھی کرکٹر کے ساتھ چائے پینے نکلی تھیں کہ یوٹرن لینے کےدوران گاڑی فٹ پاتھ  سے ٹکراگئی۔

خیال رہے کہ دونوں کرکٹرز پاکستان کے دورے پر آنے والی  ویسٹ انڈیز ویمن کرکٹ ٹیم کے خلاف 18 اپریل سے شروع ہونے والی  سیریز کے لیے تربیتی کیمپ کا حصہ ہیں۔