لاہور: وزیر اعلیٰ پنجاب مریم نواز شریف کے روشن پنجاب پروگرام کے تحت 50 ہزارگھرانوں کو ون کے وی سولر سسٹم دینے کی منظوری۔

وزیر اعلیٰ مریم نواز شریف کی زیر صدارت خصوصی اجلاس میں ایک کلو واٹ کے سولر سسٹم پر ٹیکنیکل امور پر بریفنگ دی گئی۔

اجلاس میں سینئر صوبائی وزیر مریم اورنگزیب، وزیر اطلاعات عظمیٰ زاہد بخاری، سینیٹر پرویز رشید، ایم پی اے ثانیہ عاشق، چیف سیکرٹری، چیئرمین پی اینڈ ڈی، سیکرٹریز انرجی، خزانہ، چیف ایگزیکٹو آفیسر پی پی ڈی سی ایل، مینیجنگ ڈائریکٹر پی پی ڈی بی اور دیگر حکام نے شرکت کی۔

پنجاب میں 50 ہزارگھرانوں کو ون کے وی سولر سسٹم دینے کی اصولی منظوری دے دی گئی جب کہ فوری طور پر پائلٹ پراجیکٹ شرو ع کرنے کی بھی ہدایت جاری کردی ہیں۔

مریم نواز نے مختلف گھروں میں ون کے وی سولر سسٹم لگا کر افادیت کا جائزہ لینے کا حکم دیا ہے، 100 یونٹ تک بجلی خرچ کرنے والے پروٹیکٹڈ صارفین اہل ہوں گے۔

ون کے وی سسٹم میں دو سولر پلٹیں، بیٹری، انورٹر اور تاریں دی جائیں گی جب کہ ون کے وی سولر سسٹم سے پنکھے، لائٹیں اور چھوٹی موٹر وغیرہ چلائی جاسکیں گی۔

لیتھیم آئرن بیٹری کے ذریعے 16 گھنٹے تک بیک اپ حاصل کیا جاسکے گا جب کہ جدید ترین ٹیکنالوجی کے حامل سولر سسٹم انسٹال کرنے کی ہدایت کی گئی ہے۔

وزیر اعلیٰ پنجاب مریم نواز شریف کا کہنا تھا کہ گھریلو صارفین کے لئے سولر سسٹم کا دائرہ کار بتدریج بڑھایا جائے گا، روشن پنجاب پروگرام کا مقصد غریب آدمی کو مہنگی بجلی سے نجات دلانا ہے۔