کمشنر کراچی نے شہر قائد کے شہریوں کو ایک دن کی چھٹی کی نوید سنا دی ہے۔

تفصیلات کے مطابق کمشنر کراچی نے ایک نوٹیفیکیشن جاری کیا ہے جس کے مطابق کراچی میں 23 اپریل کو عام تعطیل کا اعلان کیا گیا ہے۔

نوٹیفیکیشن کے مطابق کراچی ڈویژن کے تمام نجی، سرکاری اور تعلیمی ادارے بند رہیں گے۔

کمشنر کراچی کے جاری کردہ نوٹیفیکیشن کے مطابق 23 اپریل کو ایرانی صدر کراچی پہنچیں گے، جس کی وجہ سے شہر قائد میں چھٹی کا اعلان کیا گیا ہے۔

واضح رہے کہ ایران کے صدر ابراہیم رئیسی 3 روزہ دورے پر 22 اپریل کو پاکستان کا دورہ کریں گے، وہ اپنے دورے کے دوران اسلام آباد، کراچی اور لاہور جائیں گے۔

کراچی کے دورے کے موقع پر ایرانی صدر ابراہیم رئیسی گورنر سندھ، وزیر اعلیٰ سندھ اور دیگر اعلیٰ افسران سے ملاقات کریں گے اور مزار قائد پر بھی حاضری دیں گے۔