آرمی چیف جنرل عاصم منیر کا کہنا ہے کہ ملک کی ترقی کے سفر میں رخنہ ڈالنے والوں کی کوششیں ناکام  ہوں گی۔

گرین پاکستان انیشیٹو  کانفرنس سے خطاب کے دوران آرمی چیف  نے کہا کہ ہم سب مل کر ٹیم پاکستان ہیں، انشاء اللہ عوام کے تعاون اور سپورٹ سے پاکستان کی ترقی کے سفر میں رخنہ ڈالنے اور توجہ ہٹانے والوں کی تمام کوششیں ناکام  ہوں گی۔

جنرل عاصم منیر نے کہا کہ  منفی پروپیگنڈا اور سوشل میڈیا ٹرالز ہماری توجہ پاکستان اور اس کے عوام کی ترقی اور خوشحالی کے لیے کام کرنے سے نہیں روک سکتے۔

انہوں نے مزید کہا کہ آج کے دور میں معاشی استحکام کے بغیر مکمل خود مختاری کا تصور ممکن نہیں ۔پاکستان کی خوشحالی اور ترقی کے سفر میں کسی قسم کا عدم استحکام برداشت نہیں کیا جائے گا۔

آرمی چیف نے کہا کہ آئیے، ہم سب مل کر منفی قوتوں کو ردّ کریں اور پاکستان کی ترقی اور استحکام کے سفر پر مرکوز رہیں۔