خیرپور میں پیپلزپارٹی کی مرکزی رہنما رکن قومی اسمبلی ڈاکٹر نفیسہ شاہ جیلانی نے شہید ذوالفقارعلی بھٹو کی 45 ویں برسی کے موقع پر خراج تحسین پیش کیا۔

اس موقع پر ڈاکٹرنفیسہ شاہ نے کہا کہ شہید ذوالفقارعلی بھٹو نے 1973 میں پاکستان کو پہلا متفقہ آئین دیا جبکہ پاکستان کا ایٹمی پروگرام شروع کرنے کا سہرا بھی ان کے سر جاتا ہے۔ بھٹو خاندان آج بھی لوگوں کے دلوں پر راج کرتا ہے، ذوالفقارعلی بھٹو آج بھی لوگوں کے دلوں میں زندہ ہیں۔

پیپلزپارٹی کی رکن قومی اسمبلی ڈاکٹر نفیسہ شاہ نے کہا کہ شہید ذوالفقارعلی بھٹو کا کرشمہ ہے کہ آج ملک کا ہر شہری آئین کو مقدس دستاویز تسلیم کرتا ہے اور جمہوریت مستحکم ہو رہی ہے، مضبوط جمہوریت میں ہی ملک کی بقا ہے۔

ڈاکٹرنفیسہ شاہ نے مزید کہا کہ ہم پاکستان کی سلامتی اورآئین کی خاطر کسی بھی قربانی سے گریز نہیں کریں گے، وہ شہید ذوالفقار علی بھٹو ہی تھے جنہوں نے ہاری مزدور اور ہر شہری کو اپنی شناخت دی۔