اسلام آؓباد: ورلڈ بینک اور آئی ایم ایف کے موسم بہار کے اجلاس میں شرکت کے لیے وزیر خزانہ آج روانہ ہوں گے۔

وزیرخزانہ محمد اورنگزیب آج ایک ہفتے کے دورے پر واشنگٹن روانہ ہوں گے، وزر خزانہ آئی ایم ایف کی ایم ڈی کرسٹالینا جارجیو کے علاوہ جونیئر لیول کے امریکی حکام سے بھی ملاقاتیں کریں گے۔

ذرائع کے مطابق وزیرخزانہ امریکی نائب وزیر ڈیوڈ لو اور ڈپٹی سیکرٹری خزانہ سے بھی ملیں گے جب کہ وزیرخزانہ کے ہمراہ پاکستانی وفد بھی ہوگا۔

ذرائع کا کہنا ہے کہ وفد میں گورنر اسٹیٹ بینک جمیل احمد، سیکرٹری خزانہ امداد اللہ بوسال، سیکرٹری اقتصادی امور ڈاکٹر کاظم نیاز بھی شامل ہیں۔

ذرائع نے بتایا کہ وزیر خزانہ کا دورہ 13 سے 21 اپریل تک ہوگا جب کہ دورے کا مقصد ورلڈ بینک اور آئی ایم ایف کے موسم بہار کے اجلاس میں شرکت کرنا ہے۔

ذرائع نے یہ بھی بتایا کہ پاکستان اورآئی ایم ایف کے درمیان مذاکرات آئندہ ہفتہ شروع ہوں گے، پاکستان نئے قرض پروگرام کے لیے آئی ایم ایف کو باقاعدہ درخواست دے گا۔

ذرائع کا مزید کہنا تھا کہ پاکستان آئی ایم ایف سے مڈٹرم ایکسٹنڈڈ فنڈ فیسیلیٹی کے لئے مشن بھیجنے کی بھی درخواست کرے گا۔ عالمی ادارے کے وفد کا موجودہ پروگرام ختم ہونے کے بعد اس ماہ کے آخر تک پاکستان آنے کا امکان ہے۔