سعودی عرب میں جاری ورلڈ اکنامک فورم میں وزیر اعظم پاکستان کی امیر کویت سے ملاقات ہوئی۔

تفصیلات کے مطابق سعودی عرب کے شہر ریاض میں جاری ورلڈ اکنامک فور میں شہباز شریف نے کویت کے امیر شیخ مشعل الاحمد الجابر الصباح سے ملاقات کی۔

وزیراعظم نے اپنے دوبارہ انتخاب پر عزت مآب امیر کے تہنیتی خط پر ان کا شکریہ ادا کیا۔ اور عزت مآب شیخ مشعل الاحمد الجابر الصباح کو امیر کا عہدہ سنبھالنے پر مبارکباد دی۔

 وزیر اعظم شہباز شریف نے ان کے ساتھ مل کر کام کرنے کی خواہش کا اظہار کیا، تاکہ دوطرفہ تعلقات کو باہمی طور پر فائدہ مند اقتصادی شراکت داری میں تبدیل کیا جا سکے، جو کہ دونوں ممالک کے عوام کے بہترین مفاد میں ہو گا۔

 پاکستان اور کویت نے نومبر 2023 میں تجارت اور سرمایہ کاری میں تعاون کو مزید گہرا کرنے کے لیے متعدد مفاہمت کی یادداشتوں اور معاہدوں پر دستخط کیے تھے۔

دونوں رہنماؤں کی ملاقات میں دوطرفہ تعلقات کے علاوہ علاقائی صورتحال بالخصوص غزہ کے بحران کے حوالے سے بھی تبادلہء خیال کیا گیا۔

 وزیراعظم شہباز شریف نے کویت کے امیر کو جلد از جلد پاکستان کا سرکاری دورہ کرنے کی دعوت کا اعادہ کیا۔