پاکستان نے پانچویں ٹی ٹوئنٹی میچ میں نیوزی لینڈ کو 9 رنز سے شکست دے کر سیریز 2،2 سے برابر کر دی۔

تفصیلات کے مطابق قذافی اسٹیڈیم لاہور میں 5 میچوں کی ٹی ٹوئنٹی سیریز کے 5 اور آخری میچ میں گرین شرٹس نے بلیک کیپ کو 9 رنز سے شکست دے کر سیریز برابر کر دی۔

پاکستان کے 179 رنز کے جواب میں نیوزی لینڈ کی پوری ٹیم 19.2 اوورز میں 169 رنز بنا آؤٹ ہو گئی۔

نیوزی لینڈ کی جانب سے ٹم سیفرٹ نے 52 رنز بنائے، مائیکل بریسویل 23، جوش کلارکسن 38 اور جیمز نیشم نے 16 رنز بنائے۔

پاکستان کی جانب سے آج 8 بولرز نے بولنگ کی جو کہ ایک ریکارڈ ہے، شاہین شاہ آفریدی نے 4 وکٹیں حاصل کیں۔

اسامہ میر نے 2 جبکہ شاداب اور عماد وسیم نے ایک، ایک کھلاڑی کو آؤٹ کیا۔

اس سے قبل نیوزی لینڈ نے ٹاس جیت کر پہلے پاکستان کو بیٹنگ کی دعوت دی، پاکستان نے مقررہ 20 اوورز میں 5 وکٹوں کے نقصان پر 179 رنز بنائے۔

کپتان بابر اعظم نے 69 رنز کی اننگ کھیلی، عثمان خان 31 اور فخر زمان نے 43 رنز بنائے۔