نیوزی لینڈ نے  دورہ پاکستان کے   لیے ٹی ٹوئنٹی اسکواڈ کا اعلان کردیا۔

تفصیلات کے مطابق  نیوزی لینڈ نے پاکستان کے خلاف 18 اپریل سے شروع ہونے والی ٹی ٹوئنٹی سیریز کے لیے 15 رکنی اسکواڈ کا اعلان کردیا۔

کیوی کپتان   ٹم ساؤتھی سمیت کئی اہم کھلاڑیوں کی غیر موجودگی میں  آل راؤنڈر مائیکل بریس ویل پہلی مرتبہ ٹیم کی قیادت کریں گے۔

اسکواڈ میں تجربہ کار اور نئے ٹیلنٹ کو شامل کیا گیا ہے جن میں 7 کھلاڑی پہلے ہی ٹی ٹوئنٹی ورلڈکپ اسکواڈ کا حصہ رہ چکے ہیں۔

نیوزی لینڈ کے کین ولیمسن اور مچل سینٹنر سمیت 9 اہم کھلاڑی آئی پی ایل اور ایک کھلاڑی کاؤنٹی کھیلنے کی وجہ سے ٹیم کو دستیاب نہیں ہیں۔

نیوزی لینڈ کرکٹ کے مطابق کاؤنٹی کھیلنے کی وجہ سے ول ینگ جبکہ گھریلو مصروفیات کی باعث ٹام لیتھم بھی دستیاب نہیں ہو پائیں گے اور ٹم ساؤتھی کو ورک لوڈ منیجمنٹ کے تحت دورہ پاکستان  کے دوران آرام  دینے کا فیصلہ کیا گیا ہے۔

خیال رہے کہ پاکستان اور نیوزی لینڈ کے درمیان 5 ٹی ٹوئنٹی میچز کی سیریز 18 اپریل سے شروع ہوگی۔

نیوزی لینڈ اسکواڈ:

مائیکل بریس ویل (کپتان)، فن ایلن، مارک چیپ مین، جوش کلارکسن، جیکب ڈفی، ڈین فاکس کرافٹ، بین لِسٹر، کول میکونچی، ایڈم ملنے، جمی نیشم، ول اوورکے، ٹم رابنسن، بین سیئرز، ٹم سیفرٹ، ایش سودھی