غزہ کی وزارت صحت کا کہنا ہے کہ 7 اکتوبر سے اب تک صیہونی افواج کے ہاتھوں 36 ہزار سے زائد فلسطینی شہید ہو چکے ہیں۔

غزہ کی وزارت صحت کے ترجمان کا کہنا تھا کہ اسرائیلی فوج کی جارحیت کے باعث 7 اکتوبر 2023 سے اب تک مجموعی طور پر 36 ہزار 56 فلسطینی شہید ہو گئے ہیں۔

ترجمان کا کہنا تھا کہ اسرائیلی بربریت کا شکار ہونے والے شہیدوں میں نصف کے قریب خواتین اور معصوم بچے شامل ہیں۔

وزارت صحت نے مزید کہا کہ اسرائیلی افواج کی گولہ باری اور فائرنگ سے جہاں غزہ کھنڈر بن چکا ہے وہیں 81 ہزار 26 فلسطینی زخمی بھی ہیں۔

غزہ کی وزارت صحت کا بتانا ہے کہ جنگ کے آغاز سے اب تک زخمی ہونے والے فلسطینیوں کی تعداد 81 ہزار 26 ہوگئی ہے۔

غزہ کے جنوبی علاقے رفح میں گزشتہ شب اسرائیلی افواج نے بے گھر فلسطینیوں کے کیمپ کو جنگی طیاروں کے ذریعے نشانہ بنایا تھا۔

اس فضائی حملے سے کیمپ میں خوفناک آگ بھڑک اٹھی تھی، جس کے باعث 45 فلسطینی شہید ہو گئے تھے جن میں 23 خواتین، بزرگ اور بچے شامل ہیں۔