سپریم کورٹ آف پاکستان نے نیب ترامیم کیس کی سماعت آئندہ ہفتے تک ملتوی کر دی۔

سماعت ملتوی کرتے ہوئے چیف جسٹس پاکستان جسٹس قاضی فائزعیسٰی نے کہا کہ تاریخ کا اعلان شیڈیول دیکھ کر کرینگے۔

سماعت کے دوران وفاقی حکومت کے وکیل مخدوم علی خان نے دلائل مکمل کیے۔

بانی پی ٹی آئی نے کہا کہ آپ وکلا سے ملاقاتوں کا حکم جاری کریں۔ جس پر چیف جسٹس پاکستان نے کہا کہ آپ کے سامنے ہی حکم نامہ لکھوائیں گے۔

بانی پی ٹی آئی نے عدالت سے کہا کہ مجھے تیاری کیلئے مواد ملتا ہے نہ ہی وکلاء سے ملاقات کرنے دی جاتی، قید تنہائی میں ہوں جس پر چیف جسٹس نے کہا کہ آپ کو مواد بھی فراہم کیا جائے گا اور وکلاء سے ملاقات بھی ہوگی۔ اگرآپ قانونی ٹیم کی خدمات لینگے تو پھر آپ کو نہیں سنا جائے گا۔

بانی پی ٹی آئی نے کہا کہ کسی قانونی شخص سے معاونت تو ضروری ہے تیاری کیلئے۔ خواجہ حارث اور ایک دو اور وکلاء سے ملنا چاہتا ہوں۔ آپ سے بات کرنے کا موقع شاید دوبارہ نہ ملے۔ آٹھ فروری اور انسانی حقوق کی پامالیوں پر میری دو درخواستیں زیرالتواء ہیں۔

چیف جسٹس قاضی فائز عیسٰی نے کہا کہ آپ کے وکیل کون ہیں ان کیسز میں؟ بانی پی ٹی آئی نے جواب دیا کہ حامد خان میرے وکیل ہیں۔

چیف جسٹس نے کہا کہ حامد خان کو معلوم ہے کیسز کیسے جلدی مقرر کرائے جاتے ہیں، آج کیس نیب ترامیم کے حوالے سے ہے۔