راولپنڈی: جی ایچ کیومیں فوجی اہلکاروں کو فوجی اعزازات دینے کی تقریب کا انعقاد کیا گیا۔

پاک فوج کے شعبہ تعلقات عامہ (آئی ایس پی آر) کے مطابق جی ایچ کیو میں فوجی اعزازات سے نوازنے کی تقریب کا انعقاد کیا گیا جس کے مہمان خصوصی آرمی چیف جنرل سید عاصم منیر تھے۔

آئی ایس پی آر کا کہنا ہے کہ آرمی چیف نے جوانوں اور افسران کو فوجی اعزازات سے نوازا جب کہ شہداء کے اعزازات ان کے لواحقین نے وصول کیے۔

آئی ایس پی آر نے بتایا کہ افسران اور جوانوں کو ستارہ امتیاز ملٹری، تمغہ بسالت اور دیگر ایوارڈ دیے گئے جب کہ آرمی چیف نے شہداء اور غازیوں کی خدمات کو شاندار خراج تحسین پیش کیا۔

اس موقع پر آرمی چیف جنرل سید عاصم منیر نے کہا کہ مادر وطن کے دفاع کے لئے جان کے نذرانے سے بڑھ کر کوئی قربانی نہیں اور ہمارے شہداء کی قربانیاں ہمارے عزم کو مزید مضبوط کرتی ہیں۔

آرمی چیف کا کہنا تھا کہ شہداء کے بہادر خاندانوں کے بلند حوصلے کو سلام پیش کرتےہیں، شہداء اورغازی ہمارے قومی ہیروز ہیں۔

آرمی چیف نے مزید کہا کہ ہمارے شہداء قوم کے لئے امید اور استقامت کی کرن ہیں جب کہ ہماری آزادی اور سلامتی ان بہادر جنگجوؤں کی قربانیوں کی مرحون منت ہے۔