کراچی: کمشنر کراچی نے آٹے کے سرکاری نرخ میں کمی کا فیصلہ کرلیا۔

کراچی کے شہریوں کے لیے خوشخبری سامنے آئی ہے، جہاں کمشنر کراچی اور فلار ملز ایسوسی ایشن کے درمیان مزاکرات کامیاب ہوگئے ہیں۔

ڈھائی نمبر آٹے کی ریٹیل کی سرکاری قیمت میں 30 روپے کمی کا فیصلہ کیا گیا ہے جب کہ فائن آٹے کی ریٹیل سرکاری قیمت میں 18 روپے فی کلو کمی کا فیصلہ کیا گیا ہے۔

چیئرمین فلار ملز ایسوسی ایشن چوہدری عامر کہتے ہیں کہ کمشنر کراچی سے ڈھائی نمبر آٹے کا ریٹیل ریٹ 98 روپے فی کلو گرام پر اتفاق ہوگیا ہے جب کہ فائن آٹے کے نرخ 120 روپے مقرر کرنے کی تجویز دی ہے۔

چوہدری عامر کا کہنا تھا کہ سرکاری آٹے میں کمی کا نوٹیفکیشن جلد جاری ہو گا، ڈھائی نمبر آٹے کے ایکس مل نرخ 90 سے 92 روپے فی کلو ہوں گے۔

گندم کی فی کلو قیمت 84 روپے فی کلو گرام ہوگئی ہے جب کہ ہول سیل میں ڈھائی نمبر آٹے کے نرخ 94 روپے فی کلو ہیں۔