رفح پر اسرائیلی حملوں کے خلاف اقوام متحدہ کی سلامتی کونسل نے آج ہنگامی اجلاس طلب کرلیا۔

غیر ملکی خبر رساں ادارے کی رپورٹ کے مطابق جنوبی غزہ کے سرحدی شہر رفح میں اسرائیلی آپریشن پر اقوام متحدہ کی سلامتی کونسل نے آج ہنگامی اجلاس طلب کرلیا ہے۔

قبل ازیں چین نے رفح پر اسرائیلی حملوں کے خلاف گہری تشویش کا اظہار کیا تھا، چین کی وزارت خارجہ کی ترجمان ماؤ ننگ کہتی ہیں ’’رفح میں جاری اسرائیلی جارحیت پر چین کو گہری تشویش ہے‘‘۔

انہوں نے اقوام متحدہ کی سلامتی کونسل سے اپیل کی ’’رفح میں موجود شہریوں کی جان و مال اور املاک کی حفاظت کو یقینی بنانے کی ضرورت ہے‘‘۔

ان کا کہنا تھا ’’اسرائیل کو چاہیے کہ وہ بین الاقوامی کمیونٹی کی اپیل پر توجہ دیتے ہوئے رفح پر حملے روک دے‘‘۔

رفح میں موجود غیر ملکی صحافی نے اطلاع دی تھی کہ اسرائیل کی جانب سے جنوبی غزہ کے سرحدی شہر میں رات بھر حملے جاری رہے جس کے نتیجے میں بے گھر افراد کا مرکز تباہ ہوگیا تھا۔

واضح رہے کہ فلسطین اتھارٹی کی وزارت صحت کے مطابق جنوبی غزہ میں اتوار کی رات سے جاری اسرائیلی جارحیت کے نتیجے میں اب تک 45 افراد جاں بحق ہوچکے ہیں۔