نائب وزیراعظم اسحاق ڈار کا کہنا ہے کہ مسئلہ کشمیرکامعاملہ بھی غزہ سے مختلف نہیں، مقبوضہ کشمیرمیں انسانی حقوق کی سنگین خلاف ورزیاں ہورہی ہیں۔

نائب وزیراعظم و وزیر خارجہ اسحاق ڈار نے پریس کانفرنس کرتے ہوئے کہا کہ گیمبیا میں وزرائے خارجہ کونسل اجلاس میں شرکت کی، مقبوضہ کشمیر سے فوری غیر قانونی قبضہ ختم کیا جائے، بھارت کشمیری رہنماؤں کوفوری رہا کرے۔

نائب وزیراعظم اسحاق ڈارنے کہا کہ مسئلہ کشمیرکامعاملہ بھی غزہ سے مختلف نہیں، مقبوضہ کشمیرمیں انسانی حقوق کی سنگین خلاف ورزیاں ہورہی ہیں، مسئلہ کشمیر کے حل تک خطے میں امن قائم نہیں ہوگا، غزہ میں فوری جنگ بندی کی جائے۔

وزیرخارجہ اسحاق ڈار نے کہا کہ سعودی عرب میں دوطرفہ تعلقات کے فروغ سے متعلق مثبت پیشرفت ہوئی، پاکستان اسی رفتارپر چلے تو ہمارا مستقبل روشن ہوگا، سیکریٹری جنرل اوآئی سی سے تفصیل سے ملاقات ہوئی، سعودی قیادت کےساتھ بھی ملاقاتیں مفید رہیں۔

نائب وزیراعظم نے کہا کہ وزیراعظم شہبازشریف کی ایم ڈی آئی ایم ایف سے بھی ملاقات ہوئی، سعودی سرمایہ کاروں کا 50 رکنی وفد پاکستان آیا، وزیراعظم کی بل گیٹس، ورلڈبینک اور سعودی حکام سے ملاقاتیں ہوئی، بل گیٹس کاپاکستان میں پولیو کے خاتمےمیں اہم کردارہے۔

وزیرخارجہ نے مذید نیوز کانفرنس میں کہا کہ وزیراعظم نے ورلڈاکنامک فورم میں شرکت کی، وزیراعظم کی عالمی رہنماؤں سے غیر رسمی ملاقاتیں بھی ہوئیں، وزیراعظم کی ملائیشیا کے وزیراعظم سے بھی ملاقات ہوئی۔