وزیرخزانہ محمد اورنگزیب کی زیرصدارت اجلاس میں محصولات کی وصولی سے متعلق ایف بی آر کی کارکردگی کا جائزہ لیا گیا۔

فیڈرل بورڈ ریونیوکے اعلامیے کے مطابق وزیر خزانہ و محصولات محمد اورنگ زیب کی زیر صدارت ایف بی آر ہیڈکوارٹرز میں اجلاس منعقد ہوا۔ اجلاس میں چیئرمین ایف بی آر اور بورڈ ممبران نے شرکت کی۔

ایف بی آرکے اعلامیے میں کہا گیا کہ اجلاس میں اٹارنی جنرل منصورعثمان اعوان بھی شریک ہوئے۔ اجلاس میں محصولات کی وصولی کے حوالے سے ایف بی آرکی کارکردگی کا جائزہ لیا گیا۔

چیئرمین ایف بی آرنے رواں مالی سال کے لئے ایف بی آر کی محصولات اکٹھا کرنے کی کوششوں کے بارے بریفنگ دی۔ چیئرمین ایف بی آر نےایف بی آر کی کارکردگی بہتر بنانے کے لئے ڈیجیٹلائزیشن کے اقدامات کے بارے میں بھی بتایا۔

ایف بی آرکے اعلامیے کے مطابق وزیر خزانہ محمد اورنگ زیب نے کہا کہ ٹیکس ٹو جی ڈی پی تناسب بڑھانے اور محصولات کی وصولی میں اضافہ کے لئے ٹیکس کی بنیاد وسیع کی جائے، رواں مالی سال کے محصولات کے اہداف حاصل کرنے کے لئے ہر ممکن کوشش کی جائے۔

اجلاس میں پھنسے ہوئے محصولات کی جلد وصولی کے لئے زیرالتوا قانونی مقدمات کو فعال طور پر آگے بڑھانے کی حکمت عملی وضع کرنے پر بھی غور کیا گیا۔