پاکستان سمیت دنیا بھر میں آج مزدوروں کا عالمی دن منایا جارہا ہے جس کا مقصد ان کی قربانیوں اور حقوق کو اجاگر کرنا ہے۔ 

یکم مئی عالمی یوم مزدور کے نام سے منایا جاتا ہے تاکہ دنیا بھر میں محنت کشوں کی تاریخی جدوجہد اور کامیابیوں کو یاد کیا جاسکے لیکن حقیقت میں محنت کشوں کے نام پر منائے جانے والے اس عالمی دن پر بھی مزدور اپنے بچوں کی روٹی کی خاطر صبح سے شام تک اپنے کاموں میں جتے دکھائی دیتے ہیں۔

یکم مئی کی بنیاد کیسے پڑی؟

سنہ 1886 میں امریکہ میں ٹریڈ یونینز نے مزدوروں کی اوقاتِ کار (8 گھنٹے کرنے) کا مطالبہ کیا اور اس کے لیے انہوں نے بڑے پیمانے پر ہڑتالیں شروع کیں۔

اس سلسلے میں سب سے بڑی ہڑتال یکم مئی کو امریکی شہر شکاگو میں کی گئی اور ایک اندازے کے مطابق اس احتجاج میں 40 ہزار سے زائد افراد نے شرکت کی اور اپنے حقوق کے لیے آواز بلند کی لیکن سرمایہ کاروں اور سیاسی حلقوں سے ان کا یہ مطالبہ برداشت نہ ہوا۔

بعد ازاں پولیس اور مظاہرین کے درمیان جھڑپیں شروع ہوئیں اور اس دوران پولیس کی جانب سے مظاہرین پر فائرنگ کی گئی جس کے نتیجے میں سیکڑوں مزدور ہلاک اور زخمی ہوئے جب کہ درجنوں کو گرفتار بھی کیا گیا اور ان میں سے کچھ کو پھانسی بھی دی گئی۔

دیگر ممالک میں یوم مزدور کا آغاز

شکاگو کے محنت کشوں کے ساتھ اظہار یکجہتی کیلئے دنیا کے بیشتر ممالک میں یکم مئی کو محنت کشوں کا عالمی دن منایا جاتا ہے۔

پاکستان میں قومی سطح پر یوم مزدور منانے کا باضابطہ آغاز 1972 میں ہوا اور پہلی مرتبہ یکم مئی 1972 کو سرکاری سطح پر محنت کشوں کا عالمی دن قرار دیا گیا۔

اس دن کی مناسبت سے ملک بھر کے تمام چھوٹے بڑے شہروں میں تقریبات، سیمینارز، کانفرنسز اور ریلیوں کا انعقاد کیا جاتا ہے۔

دوسری جانب پڑوسی ملک بھارت 1923 سے ہی اس دن کو مزدوروں کے نام کر رکھا تھا اور اس کا آغاز یکم مئی 1923 کو مزدور کسان پارٹی نے مدارس میں کیا تھا۔

مزدوروں کی حالت زار

نجی ٹی چینل سے بات کرتے ہوئے مزدور رہنماؤں نے بتایا کہ نجی شعبے میں کام کرنے والے لاکھوں محنت کشوں کو آج بھی صحت کی سہولتوں سمیت سوشل سیکیورٹی تک دستیاب نہیں جب کہ حکومت کی جانب سے کم از کم اجرت کے اعلان پر بھی اب تک عمل درآمد نہیں ہوا ۔

مزدور رہنماؤں کا مطالبہ ہے کہ قومی، صوبائی اسمبلیوں سمیت سینیٹ میں محنت کشوں کی نمائندگی کے بغیر مزدوروں کے مفاد میں قانون سازی نہیں کی جا سکتی لہذا تمام سیاسی جماعتوں کو مزدوروں کے لیے مخصوص نشستیں مختص کرنا ہوں گی۔

ساجد حسین نامی مزدور نے بول نیوز سے بات کرتے ہوئے بتایا کہ میں پلمبر کی مزدوری کرتا ہوں اور روز اپنے گھر سے دو وقت کی روٹی کمانے کی امید لٸے بازار کا رخ کرتا ہوں لیکن کاروباری حالات کی وجہ سے دن بھر گاہکوں کا انتظار کرتا مایوس گھر لوٹ جاتا ہوں، جس کی وجہ سے گھر کا کرایہ بجلی گیس کہ بل کہ ساتھ خوراک کی ضروریات پوری کرنا ناممکن ہوچکا ہے۔

سندھ میں مزدور کی ماہانہ تنخواہ واجرت 35 ہزار روپے کہ حساب سے مقرر کی گٸی ہے مگر اس کہ برعکس سرکاری اداروں ہیلتھ ، واسا ، سندھ بلڈنگ کنٹرول ہو یا میونسپل کارپوریشن میں یومیہ اجرت پر کام کرنے والے مزدور دس سے 15 ہزار ماہانہ کماتے ہیں۔

یوم مزدور پر گوگل کا خصوصی ڈوڈل

لیبر ڈے پر گوگل کا ڈوڈل بھی بدل گیا۔ دنیا کے معروف سرچ انجن گوگل نے بھی مزدوروں کے ساتھ اظہار یکجہتی کے لیے اپنا ڈوڈل تبدیل کردیا۔

گوگل کی جانب سے جاری کئے جانے والے ڈوڈل میں مزدور مختلف کام کرتے ہوئے دکھائی دے رہے ہیں۔ گوگل ڈوڈل میں جن کاموں کی تصویر کشی کی گئی ہے اس میں پلمبر، ویلڈر اور کلینر شامل ہیں جو روزانہ کی بنیاد پر دنیا بھر میں دیگر انسانوں کی زندگی اپنے ان کاموں کی وجہ سے آسان اور پرسکون بنانے میں اہم کردار ادا کرتے ہیں۔

وزیراعظم پاکستان کا پیغام

مزدوروں کے عالمی دن کے موقع پر وزیر اعظم پاکستان نے اپنے پیغام میں محنت کشوں کو خراج تحسین پیش کیا۔

 وزیر اعظم شہباز شریف کا کہنا تھا کہ جو رزق حلال کے حصول کی خاطر کھیتوں، کھلیانوں، کارخانوں اور مختلف شعبوں میں محنت سے دن رات اس ملک کی معیشت اور اسکی تعمیر و ترقی میں اپنا کلیدی کردار ادا کرتے ہیں۔

 انہوں نے کہا کہ یہ لوگ نہ صرف اپنے خاندان کا پیٹ پالنے کے لیے دن رات ایک کرتے ہیں بلکہ پاکستان کی ترقی کے لیے بھی اپنا خون پسینہ بہاتے ہیں۔

وزیرداخلہ کا پیغام

وفاقی وزیر داخلہ محسن نقوی نے محنت کشوں کے عالمی دن پر پیغام دیتے ہوئے کہا کہ پاکستان کی تمام افرادی قوت کو دلی مبارکباد دیتا ہوں اور نیک تمناؤں کا اظہار کرتا ہوں۔

انہوں نے کہا کہ یہ دن ہمیں جبر و استبداد کے خلاف شکاگو کے شہداء کی جدوجہد کی یاد دلاتا ہے، محنت کش ہمارے ہیرو ہیں جو رزق حلال کما کر معیشت کو مضبوط کرتے ہیں۔