آئی پی ایل میں شرکت کرنے والے انگلش کھلاڑیوں نے ٹی ٹوئنٹی ورلڈ کپ اور پاکستان کے خلاف سیریز کے لیے واپسی وطن کی تیاری پکڑلی۔

دہلی کیپیٹلز کے خلاف رائل چیلنجرز بنگلورو کی جیت کے بعد انگلش کھلاڑی ول جیکسن اور ریس ٹوپلی واپس انگلینڈ روانہ ہوگئے ہیں جب کہ جوز بٹلر نے پنجاب کنگز کے خلاف میچ سے قبل ہی راجھستان رائلز کا کیمپ چھوڑ دیا ہے۔

معین علی، جانی بیرسٹو، سیم کرن اور فل سالٹ جیسے دیگر کھلاڑی بھی اس ہفتے بھارت سے روانہ ہوکر اسکواڈ کو دوبارہ جوائن کرلیں گے۔ گھٹنے کی انجری کے شکار لیام لیونگسٹن نے بھی پنجاب کنگز کو چھوڑنے کا فیصلہ کیا ہے۔

انگلش کرکٹ ٹیم 22 مئی کو ہیڈنگلے میں پاکستان کے خلاف اپنے پہلے ٹی ٹوئنٹی میچ سے قبل لیڈز میں دوبارہ منظم ہوگی۔

واضح رہے کہ پاکستان اور انگلینڈ کی ٹیموں کے درمیان چار میچز کی ٹی ٹوئنٹی سیریز کا آغاز 22 مئی سے ہونے جارہا ہے جس میں شرکت کے لیے کھلاڑی وطن پہنچیں گے۔