وزیر اعظم شہباز شریف نے ضلع خیبر میں دہشت گردوں کے خلاف کامیاب آپریشنز پر پاک فوج کو زبردست خراج تحسین پیش کیا۔

وزیرِ اعظم محمد شہباز شریف نے ٹانک ڈیرہ اسماعیل خان اور باغ، ضلع خیبر میں افواج پاکستان کے دہشت گردوں کے خلاف کامیاب آپریشن پر افسران و جوانوں کو خراج تحسین پیش کیا۔

وزیرِاعظم نے باغ، ضلع خیبر میں آپریشن کے دوران جام شہادت نوش کرنے والے 5  جوانوں، نائیک محمد اشفاق بٹ، لانس نائیک سید دانش افکار، سپاہی تیمور ملک، سپاہی نادر صغیر، اور سپاہی محمد یاسین کو خراجِ عقیدت پیش کیا۔

وزیر اعظم نے کہا کہ افواجِ پاکستان کے جوانوں نے اپنی جانوں کی پرواہ کئے بغیر دہشت گرد عناصر کی سرکوبی کیلئے کارروائی کی، اللہ رب العزت شہداء کے درجات بلند اور انکے اہلِ خانہ کو صبر جمیل عطا کرے.

وزیر اعظم شہباز شریف نے کہا کہ مجھ سمیت پوری قوم شہداء کے اہلِ خانہ کو خراجِ تحسین پیش کرتی ہے، افواج پاکستان کے افسران اور جوانوں نے ملکی سلامتی کو ہمیشہ اپنی جانوں پر فوقیت دی.

وزیر اعظم شہباز شریف کا مزید کہنا تھا کہ دہشت گردی کے ناسور کے ملک سے خاتمے تک اس کے خلاف جنگ جاری رکھیں گے اور پوری قوم دھشتگردی کے خلاف اس جنگ میں افواج پاکستان کے شانہ بشانہ کھڑی ہے۔