وفاقی وزراء محسن نقوی اور خواجہ آصف کا سیالکوٹ ایئرپورٹ کا دورہ
وفاقی وزیرداخلہ و انسداد منشیات محسن نقوی اور وفاقی وزیر ایوی ایشن و دفاع خواجہ محمد آصف نے سیالکوٹ ایئرپورٹ کا 2 گھنٹے تک دورہ کیا۔
وفاقی وزراء نے سیالکوٹ ائرپورٹ پر آمد و روانگی ٹرمینلز پرمسافروں کےلئے سہولتوں کا جائزہ لیا اور بیرون ملک جانے والے مسافروں کے لئے موجود سہولتوں پر عدم اطمینان کا اظہار کیا۔
وفاقی وزراء نے سیالکوٹ ائرپورٹ پر مسافروں کی آسانی کے لئے سہولتیں بڑھانے کا حکم بھی دیا۔
اس موقع پر وزیر داخلہ محسن نقوی کا کہنا تھا کہ بیرون ملک جانے والے مسافروں کو امیگریشن کے لئے 60 منٹ تک انتظار کرنا پڑتا ہے، مسافروں کے لئے امیگریشن کاونٹرز میں اضافے کیا جائے گا تاکہ انہیں انتظار نہ کرنا پڑے۔
خیال رہے کہ سیالکوٹ ائرپورٹ آج صبح 9 بجے سے رن وے توسیعی پراجیکٹ کے باعث 15 روز کے لئے بند ہو رہا ہے۔
محسن نقوی نے ائیرپورٹ بندش کے دوران ہی امیگریشن کاونٹرز بڑھانے کا حکم دیتے ہوئے کہا کہ امیگریشن کے 12 کاونٹرز ائیرپورٹ دوبارہ کھلنے پر فعال ہونے چاہیں۔
انہوں نے مزید کہا کہ ائرپورٹ کی بندش کے دوران مسافروں کے لئے مزید سہولتوں کی فراہمی کے عمل کو مکمل کیا جائے، مسافر ہمارے معزز مہمان ہیں۔انہیں زیادہ سے زیادہ آرام و آسانی دینا ذمہ داری ہے۔
دوسری جانب خواجہ آصف کا کہنا تھا کہ مسافروں کی سہولت کیلئے سرچ کے عمل کو آسان بنایا گیا ہے، سیالکوٹ ایئرپورٹ پر اے این ایف۔ کسٹمز اور اے ایس ایف مسافروں کو 3 مقامات نہیں بلکہ ایک ہی جگہ چیک کرتے ہیں۔
وفاقی وزراء نے سیالکوٹ ائیرپورٹ پر امیگریشن کاونٹرز اور دیگر سہولتوں کے کام کو 15 روز مکمل کرنے کے لیے متعلقہ حکام کو ہدایات دیں۔
چیف ایگزیکٹو آفیسر سیالکوٹ ائرپورٹ ائیر وائس مارشل ریٹائرڈ تنویر اشرف بھٹی۔اینٹی نارکوٹکس فورس پنجاب کے بریگیڈئر سکندر، ایف آئی اے گوجرانوالہ زون کے ڈائریکٹر ساجد اکرم ائیرپورٹ مینجر نثار احمد اور متعلقہ حکام بھی اس موقع پر موجود تھے۔
Catch all the Business News, Breaking News Event and Latest News Updates on The BOL News
Download The BOL News App to get the Daily News Update & Live News