مغربی ممالک ناروے، آئرلینڈ اور اسپین  نے فلسطینی ریاست کو تسلیم کرنے کا اعلان کردیا۔

بین الاقوامی خبررساں ادارے کے مطابق  ناروے، آئرلینڈ اور اسپین نے بدھ کو کہا کہ وہ ایک تاریخی اقدام میں فلسطینی ریاست کو تسلیم کر رہے ہیں ۔

ناروے، آئرلینڈ اور اسپین کے اس اقدام کی  اسرائیل کی طرف سے مذمت   کی گئی ہے جبکہ فلسطینیوں کی جانب سے خوشی کا اظہار کیا گیا ہے۔

 اسرائیل نے فوری طور پر ناروے اور آئرلینڈ سے اپنے سفیروں کو واپس بلانے کا حکم دیا اور اسپین میں اپنے سفیر کے ساتھ بھی ایسا کرنے کے لیے تیار  ہے۔

ناروے کے وزیر خارجہ نے ایک نیوز کانفرنس میں بتایا کہ تینوں اقوام کی طرف سے آزاد فلسطینی ریاست کو سرکاری طور پر تسلیم کرنے کا  باضابطہ عمل 28 مئی کو ہو گا۔

ناروے کے وزیر اعظم کا کہنا ہے کہ مشرق وسطیٰ میں اس وقت تک امن نہیں ہو سکتا جب تک فلسطین کو تسلیم نہ کیا جائے، فلسطینی ریاست کو تسلیم کر کے، ناروے عرب امن منصوبے کی حمایت کرتا ہے۔

یورپی یونین کے کئی ممالک نے خطے میں پائیدار امن کے لیے دو ریاستی حل کو لازمی قرار دیتے ہوئے گزشتہ ہفتوں میں اشارہ دیا ہے کہ وہ بھی ایسا ہی اقدام کرنے کا ارادہ رکھتے ہیں۔