رواں سال امریکا اور ویسٹ انڈیز میں ہونے والے ٹی ٹوئںٹی ورلڈکپ سے قبل آسٹریلیا ٹیم کے کپتان کی شرکت مشکوک دکھائی دے رہی ہے۔ 

آسٹریلیا کی ٹی ٹوئنٹی کرکٹ ٹیم کے کپتان مچل مارش انڈین پریمئیر لیگ (آئی پی ایل) کے رواں سیزن میں انجرڈ ہوگئے تھے۔ ہیمسٹرنگ انجری کا شکار ہونے والے مچل مارش فوری طور پر ٹورنامنٹ چھوڑ کر وطن واپس لوٹ گئے تھے۔

تاہم میگا ایونٹ سے قبل آسٹریلوی کپتان مچل مارش کی فٹنس سوالیہ نشان بن گئی ہیں کیوں کہ ان کی بحالی کا عمل سست روی کا شکا ہے اور انہوں نے آج آسٹریلیا میں دستیاب پلیئرز کے ساتھ برسبین میں کیمپ میں شرکت کی تاہم وہ مکمل فٹ نہیں دیکھائی دیئے۔

آسٹریلیا کرکٹ ٹیم کے ہیڈ کوچ اینڈریو میکڈونلڈ کا دعویٰ ہے کہ کپتان مچل مارش کی فٹنس بہتر ہورہی ہے، میگا ایونٹ سے قبل مکمل فٹ ہوجائیں گے کیوں کہ ٹی ٹوئنٹی ورلڈکپ میں ابھی ایک ماہ کا وقت ہے اور انہیں فٹ ہونے کے لیے مزید دو ہفتے درکار ہیں۔

واضح رہے کہ دیگر ٹیموں کی طرح آسٹریلیا بھی ٹی ٹوئنٹی ورلڈکپ کے لیے 15 رکنی اسکواڈ کا اعلان کرچکی ہے جس میں مچل مارش کو کپتان مقرر کیا گیا ہے جب کہ اسیٹو اسمتھ اسکواڈ میں جگہ بنانے میں ناکام رہے ہیں۔