کراچی کی تاریخ میں فیکٹریوں اور بینکوں سے بھاری رقم  لے کر جانے والوں کو لوٹنے والا سب سے بڑا گروہ پکڑا گیا۔

کراچی پولیس نے فیکٹریوں اور بینکوں سے بھاری رقم  لے کر جانے والوں کو لوٹنے والا سب سے بڑا گروہ پکڑ لیا ہے جس سے 24 وارداتوں میں کروڑوں روپے لوٹنے کا انکشاف ہوا ہے۔

نیو کراچی صنعتی ایریا انویسٹی گیشن پولیس نے ٹیکنیکل بنیادوں پر 5 ملزمان کو گرفتار کیا جس نے اہم انکشافات کردیے ہیں جب کہ گرفتار ملزمان کا ویڈیو بیان بول نیوز کو موصول ہوگیا ہے۔

کراچی پولیس کے مطابق گرفتار ڈکیت گروہ انفارمیشن پر کام کرتا تھا، ملزمان کو پیسوں کی اطلاع  ملتی تھی جس پر ریکی کے بعد واردات کرتے تھے۔

پولیس کا کہنا ہے کہ گرفتار ملزمان کی وارداتوں کی سی سی ٹی وی فوٹیجز بھی سامنے آگئی ہیں جب کہ فوٹیجز میں ملزمان کو وارداتیں کرتے دیکھا جاسکتا ہے۔

یاد رہے کہ گرفتار ملزمان اس سے قبل اے ٹی سی کورٹ اور پولیس مقابلے جیسے سنگین مقدمات  میں شامل رہے ہیں اور عادی جرائم پیشہ ہیں۔

ملزمان دوران واردات مزاحمت پر فائرنگ کرکے ہلاک کرنے سے بھی دریغ نہیں کرتے تھے جب کہ پولیس نے ملزمان کے خلاف مقدمہ درج کرکے مزید تفتیش کا آغاز کردیا ہے۔