اسلام آباد: ایف بی آر کے مطابق پاکستان کسٹمز نے ورلڈ بینک کے مالی تعاون سے شروع پراجیکٹ میں اہم پیش رفت حاصل کرلی۔

فیڈرل بورڈ آف ریونیو (ایف بی آر) کی جانب سے اعلامیہ جاری کیا گیا ہے جس کے مطابق عالمی بینک کے مالی تعاون سے کسٹمز کے بنیادی فنکشنز کی بزنس پراسسنگ میپنگ مکمل کرلی گئی ہے۔

ایف بی آر کا کہنا ہے کہ مقامی طورپر تیار کردہ وی بک سسٹم ایف بی آر کو سالانہ ہدف کے 45   فیصد سے بھی زیادہ محصولات جمع کرنے کے قابل بناتا ہے۔

اعلامیہ میں کہا گیا ہے کہ اس سسٹم کی بدولت درآمدات، برآمدات اور ٹرانزٹ ٹریڈ کو پیپر لیس ماحول میں ہینڈل کیا جاتا ہے، پاکستان کسٹمز بڑھتی ہوئی سرحد پار تجارت اور ٹرانزٹ سپلائی چین کی عالمگیریت اور نئی ٹیکنالوجیز کے چیلنجز سے آگاہ ہے۔

ایف بی آر نے کہا کہ پاکستان کسٹمز کا روایتی کردار اب تجارتی سہولت کاری، علاقائی روابط، بارڈر کنٹرول اور اقتصادی ترقی میں تبدیل ہورہا ہے، منصوبے کے اگلے مرحلے میں میپنگ کے عمل کو عالمی معیارات کے مطابق ری ڈیزائن کیا جائے گا۔

اعلامیہ کے مطابق یہ منصوبہ پاکستان کسٹمز کو مکمل طور پر ڈیجیٹلائز کرنے اور آپریشنل ماڈل کو ازسر نو ترتیب دے گا، رسک مینجمنٹ اور کلیئرنس کے بعد آڈٹ کی صلاحیت کی اپ گریڈیشن سے وسائل کا رخ زیادہ اہم کاموں کی طرف موڑا جاسکے گا۔

اعلامیہ میں مزید کہا گیا ہے کہ اس منصوبے میں جدید ترین ہائپر آٹو میشن ٹولز کی تنصیب شامل ہے،  کسٹمز کے نئے جامع ڈیجیٹل سسٹم سے کاروبار کرنے میں آسانیاں مہیا کی جاسکیں گی۔