انٹر سٹی اور بین الصوبائی مسافر گاڑیوں میں عید کی چھٹیاں منانے والے مسافروں سے زائد کرایہ وصول کرنے خلاف کارروائی جاری ہے۔

محکمہ ٹرانسپورٹ اور ماس ٹرانزٹ ڈپارٹمنٹ کی جانب سے سینئر وزیر شرجیل انعام میمن کی ہدایات پر اضافی کرایوں کی وصولی کے خلاف کارروائیاں کی جار رہی ہیں۔

اس حوالے سے سیکریٹری پی ٹی اے، آر ٹی اے، اور ڈی آر ٹی اے سمیت دیگر فیلڈ افسران کی جانب سے انٹر سٹی اور بین الصوبائی مسافر گاڑیوں کی چیکنگ کی جارہی ہے۔

مہم کے دوران 1105 گاڑیاں چیک کی گئی، مسافروں سے لی جانے والی 12 لاکھ 37 ہزار روپے کی اضافی رقم موقعہ پر ہی مسافروں کو واپس کروائی گئی۔

 اضافی کرایہ وصول کرنے والے ٹرانسپورٹرز پر 12 لاکھ 88 ہزار کے جرمانے عائد کئے گئے۔

 پی پی کے سینئر رہنما شرجیل انعام میمن کا کہنا تھا کہ مسافروں کو رلیف کی فراہمی اور منصفانہ کرائے کی وصولی کو یقینی بنانا حکومت کی اولین ترجیح ہے۔

انہوں نے کہا کہ مہم کا مقصد مسافروں کو درپیش پریشانیوں اور دشواریوں کا خاتمہ ہے۔

شرجیل انعام میمن کا مزید کہنا تھا کہ مسافروں کے ساتھ ناانصافی کرنے والوں کو معاف نہیں کیا جائے گا۔