کراچی: سہراب گوٹھ جمالی پل کے قریب نامعلوم ملزمان کی فائرنگ سے ایک پولیس اہلکار شہید اور دوسرا زخمی ہوگیا۔

کراچی کے علاقے سہراب گوٹھ جمالی پل کے قریب پولیس مقابلے میں ایک پولیس شہید جب کہ دوسرا زخمی ہوگیا ہے۔

سہراب گوٹھ میں نامعلوم ملزمان کی فائرنگ سے پولیس اہلکار کی شہادت پر وزیر داخلہ سندھ ضیاء الحسن لنجار نے ایس ایس پی ایسٹ سے تفصیلات طلب کرلی ہیں۔

وزیر داخلہ سندھ نے ہدایت کی کہ جائے وقوعہ سے دستیاب شہادتوں کو جدید تیکنیک کی روشنی میں کامیاب بنایا جائے، ملزمان کی گرفتاری کے لئے پورے ضلع کی فورس لگادیں۔

ضیاء الحسن لنجار نے کہا کہ پولیس اہلکار کی شہادت میں ملوث ملزمان کی جلد سے جلد گرفتاری کو یقینی بنایا جائے جب کہ ملزمان کی گرفتاری کے لیے دستیاب جدید ٹیکنالوجی بشمول جیو فینسنگ سے استفادہ حاصل کیا جائے۔

پولیس حکام کے مطابق شہید اور زخمی پولیس اہلکار ہیڈ کوارٹر ایسٹ زون میں تعینات تھے، اہلکاروں کو مویشی منڈی کے پکٹ پر تعینات کیا گیا تھا جب کہ شہید اہلکار کا نام یاسین اور زخمی کا عباس ہے۔

دوسری جانب ایس ایس پی ایسٹ فرخ رضا نے موقع پر پہنچ پر کہا کہ مویشی منڈی اور نادرن بائی پاس پر شہریوں کی جان و مال کے لیے چیک پوسٹ قائم ہے جب کہ نادرن بائی پاس کے اطراف سیکیورٹی کوریڈور بنایا گیا ہے۔

فرخ رضا کہتے ہیں کہ مویشی منڈی کے لیے 29 چیک پوسٹ بھی قائم کی گئی ہیں، چیک پوسٹ پر ہونے والے حملے میں اہلکار یاسین شہید اور سلمان عباس زخمی ہوئے ہیں۔

ایس ایس پی ایسٹ نے کہا کہ کرائم سین یونٹ کے شواہد اور انٹیلیجنس بیس پر تحقیقات شروع کردی ہیں، حملے میں ملوث دہشت گردوں کو جلد کیفر کردار تک پہنچایا جائے گا۔