سعودی عرب کی حکومت نے حج 2024 کے بعد ملکی و غیر ملکی افراد کے لیے بڑی خوشخبری کا اعلان کر دیا ہے۔

سعودی میڈیا کے مطابق سعودی عرب کی وزارت حج و عمرہ نے عمرہ کے لیے ویزے جاری کرنا شروع کر دیے ہیں، نیا عمرہ سیزن محرم الحرام 1145ہجری (19 جولائی) کے مہینے کے ساتھ مطابقت رکھتا ہے۔

جو لوگ رواں سال حج پر نہ جا سکے اور عمرہ ادا کرنے کی خواہش رکھتے ہیں، وہ نوشک ایپلی کیشن کے ذریعے الیکٹرانک ویزا کے لئے درخواست دے سکتے ہیں۔

اس اقدام کا مقصد مملکت میں زائرین کی آمد کو آسان بنانا اور ایک ہموار تجربے کو یقینی بنانا ہے۔

سعودی سرکاری خبر ایجنسی نے کہا کہ وزارت زیادہ سے زیادہ زائرین کو ایڈجسٹ کرنے اور ان کی ضروریات اور امنگوں کو پورا کرنے والی خدمات فراہم کرنے کے لئے کام کر رہی ہے۔

واضح رہے کہ سعودی عرب نے حج سیزن کی تیاری کے لیے نوشک ایپ کے ذریعے عمرہ ویزوں کا اجرا عارضی طور پر معطل کردیا تھا۔ یہ معطلی 23 مئی سے 21 جون تک نافذ العمل تھی۔

اس عرصے کے دوران تمام قسم کے وزٹ ویزا ہولڈرز کے مکہ مکرمہ میں داخلے پر پابندی عائد کردی گئی تھی۔