لاہور: محکمہ داخلہ پنجاب نے جیلوں میں طلبہ کو انٹرنشپ کروانے کا فیصلہ کرلیا۔

وزیر اعلیٰ پنجاب مریم نواز کا تاریخی اقدام سامنے آیا ہے جس کے تحت محکمہ داخلہ پنجاب نے جیلوں میں طلبہ کو انٹرنشپ کروانے کا فیصلہ کیا ہے۔

سیکرٹری داخلہ پنجاب نور الامین مینگل کا کہنا ہے کہ پنجاب بھر کی جیلوں میں سائیکالوجی، کریمنالوجی اور قانون کے طلبہ کو پیڈ انٹرنشپ کروائی جائے گی۔

انہوں نے کہا کہ قیدیوں کے ساتھ سیشنز میں انہیں معاشرے کا مثبت حصہ بنانے پر کام ہوگا جب کہ پروگرام سے خواتین، بچوں اور بزرگوں کو فری لیگل ایڈ میسر آئے گی۔

سیکرٹری داخلہ پنجاب کہتے ہیں کہ اہم مقصد کے لئے پنجاب بھر سے بہترین طلبہ کا انتخاب کیا جائے گا اور پیڈ انٹرنشپ کے لئے طلبہ کو بذریعہ اشتہار اور انٹرویو سلیکٹ کیا جائے گا۔

نور الامین مینگل کا کہنا تھا کہ منتخب طلبہ کو جیلوں میں سیشنز پر اعزازیہ بھی ادا کیا جائے گا جب کہ تمام طلبہ کو ان کے ڈومیسائل کے ضلع میں خدمات کا موقع دیا جائے گا۔

سیکرٹری داخلہ پنجاب نے مزید کہا کہ متعلقہ ضلع کے ڈپٹی کمشنرز جیل ریفارمز پراجیکٹ کے سربراہ ہوں گے۔