وزیر بلدیات سندھ سعید غنی نے کراچی میں لیاقت آباد 10 نمبر کے قریب ایک منزلہ عمارت گرنے کا نوٹس لے لیا۔

وزیربلدیات سندھ سعید غنی نے ڈی جی سندھ بلڈنگ کنٹرول اتھارٹی اور ڈپٹی کمیشنر سینٹرل سے فوری رپورٹ پیش کرنے کی ہدایات کردی۔

سعید غنی نے کہا کہ اس واقعہ کے پس پشت تمام عوامل کو رپورٹ میں واضح کیا جائے۔  حادثہ میں کسی کی ہلاکت یا زخمی نہ ہونے پر اللہ تعالٰی کے شکر گذار ہیں۔

وزیر بلدیات سندھ نے کہا کہ ایس بی سی اے فوری طور پر کراچی میں مخدوش جاری کی گئی عمارتوں کو خالی کروا کر ان کو ڈیمولیس کرے۔ ممکنہ مون سون بارشوں کے پیش نظر کسی قسم کی کوئی کوتاہی کو برداشت نہیں کیا جائے گا۔

سعید غنی نے مزید کہا کہ ڈپٹی کمیشنرز اور دیگر تمام اس حوالے سے اپنے اپنے ڈسٹرکٹ میں مخدوش عمارتوں کے خلاف کارروائی کریں۔