امریکہ نے گزشتہ سال 7 اکتوبر سے اب تک اسرائیل کو فلسطینیوں کی نسل کشی کے لیے 2 ہزار پاؤنڈ کے ہزاروں بم بھیجے۔

تفصیلات کے مطابق دو امریکی عہدیداروں نے بتایا کہ بائیڈن انتظامیہ نے غزہ میں جنگ کے آغاز سے اب تک اسرائیل کو بڑی تعداد میں اسلحہ بھیجا ہے جن میں 10 ہزار سے زائد تباہ کن 2 ہزار پاؤنڈ کے بم اور ہزاروں ہیل فائر میزائل شامل ہیں۔

حکام کے مطابق گزشتہ اکتوبر میں جنگ کے آغاز اور حالیہ دنوں کے درمیان امریکہ نے کم از کم 14 ہزار ایم کے-84 2 ہزار پاؤنڈ کے بم، 6 ہزار 5 سو 500 پاؤنڈ کے بم، 3 ہزار ہیل فائر گائیڈڈ ایئر ٹو گراؤنڈ میزائل، 1 ہزار بنکر بسٹر بم اور 2 ہزار 6 سو ایئر گرائے گئے چھوٹے قطر کے بم اور دیگر گولہ بارود منتقل کیے ہیں۔

اگرچہ حکام نے ان کھیپوں کی کوئی ٹائم لائن نہیں بتائی لیکن اعداد و شمار سے ظاہر ہوتا ہے کہ ہتھیاروں کی فراہمی محدود کرنے کے بین الاقوامی مطالبے اور طاقتور بموں کی ترسیل روکنے کے حالیہ انتظامیہ کے فیصلے کے باوجود اپنے اتحادی کے لیے امریکی فوجی امداد میں کوئی خاص کمی نہیں آئی ہے۔

ماہرین کا کہنا ہے کہ ان کھیپوں کے مندرجات غزہ میں آٹھ ماہ تک جاری رہنے والی اس فوجی مہم میں استعمال ہونے والی رسد کو دوبارہ بھرنے کے لیے اسرائیل کو درکار سامان سے مطابقت رکھتے ہیں، جو اس نے 7 اکتوبر کو فلسطینی حماس کے عسکریت پسندوں کے حملے کے بعد شروع کیا تھا، جس میں 1200 افراد ہلاک اور 250 دیگر کو یرغمال بنایا گیا تھا۔

سینٹر فار اسٹریٹجک اینڈ انٹرنیشنل اسٹڈیز میں ہتھیاروں کے ماہر ٹام کاراکو نے کہا کہ اگرچہ یہ تعداد کسی بڑے تنازعے میں نسبتا تیزی سے خرچ کی جا سکتی ہے، لیکن یہ فہرست واضح طور پر ہمارے اسرائیلی اتحادیوں کے لیے امریکہ کی جانب سے کافی حد تک حمایت کی عکاسی کرتی ہے۔

وائٹ ہاؤس نے اس پر تبصرہ کرنے سے انکار کر دیا ہے۔ واشنگٹن میں اسرائیلی سفارت خانے نے فوری طور پر تبصرہ کرنے کی درخواست کا جواب نہیں دیا۔

ایک امریکی عہدیدار کا کہنا تھا کہ یہ کھیپ غزہ تنازع شروع ہونے کے بعد سے اسرائیل کو بھیجے جانے والے ہتھیاروں کی ایک بڑی فہرست کا حصہ ہے۔

بائیڈن انتظامیہ کے ایک سینئر عہدیدار نے بدھ کے روز نامہ نگاروں کو بتایا کہ واشنگٹن نے 7 اکتوبر سے اب تک اسرائیل کو 6.5 ارب ڈالر مالیت کے ہتھیار بھیجے ہیں۔