امریکی ایوان نمائندگان کی قرارداد 901 پر پاکستان کا رد عمل سامنے آگیا۔

ترجمان دفترخارجہ کی جانب سے جاری بیان میں کہا گیا ہے کہ پاکستان نے امریکی ایوان نمائندگان کی قرارداد 901 کی منظوری کا نوٹس لیا ہے، پاکستان سمجھتا ہے کہ قرارداد کی منظوری کا وقت اور متن پاک امریکہ دو طرفہ تعلقات کی مثبت جہتوں سے مطابقت نہیں رکھتا۔

ترجمان دفتر خارجہ نے کہا کہ قرارداد 901 پاکستان کی سیاسی صورتحال اور انتخابی عمل سے ادھوری واقفیت ظاہر کرتی ہے،  پاکستان دنیا کی دوسری بڑی پارلیمانی اور پانچویں بڑی جمہوریت ہے۔

ترجمان نے کہا کہ پاکستان اپنی آئینی اقدار ،انسانی حقوق اور قانون کی عملداری کے لیے پرعزم ہے، پاکستان باہمی احترام اور ہم اہنگی پر مبنی مثبت بات چیت اور رابطوں پر یقین رکھتا ہے۔

ترجمان دفترخارجہ کا کہنا تھا کہ امریکی ایوان نمائندگان کی قرارداد تعمیری ہے اور نہ ہی بامقصد، پاکستان توقع رکھتا ہے کہ امریکی کانگرس پاک امریکہ تعلقات کو مضبوط بنانے کے لیے کردار ادا کرے گی۔

ترجمان نے مزید کہا کہ پاکستان توقع رکھتا ہے کہ امریکی کانگرس دونوں ممالک اور ان کے عوام کے باہمی مفاد اور اشتراک کار کو فروغ دینے پر توجہ مرکوز کرے گی۔

واضح رہے کہ امریکی ایوان نمائندگان نے پاکستان کے عام انتخابات کی تحقیقات کا مطالبہ کردیا۔

امریکی ایوان نمائندگان سے 7 کے مقابلے میں 368 ووٹوں سے منظور نان بائنڈنگ قراراداد میں کہا گیا ہے کہ 8 فروری کے الیکشن میں مداخلت اور بے ضابطگیوں کے دعوؤں کی آزادانہ اور غیرجانبدارانہ تحقیقات کی جائیں ۔

قرارداد میں مزید کہا گیا ہے کہ پاکستان میں عوام کو جمہوری عمل میں شرکت سے روکنے کے لیے عوام کو دبانے کی کوششوں کی مذمت کرتے ہیں۔