متحدہ عرب امارات کی کابینہ نے عصمت دری  یا  محرم (شوہر کے علاوہ) رشتے کے ذریعے ہونے والے حمل کے کیسز کے لیے اسقاط حمل کی مشروط اجازت دینے کی قرارداد منظور کی ہے ۔

متحدہ عرب امارات کے سرکاری انگریزی اخبار کے مطابق طبی ذمہ داری کے قانون 2024 کی کابینہ کی قرارداد نمبر (44) میں کہا گیا ہے کہ اگر کسی خاتون کے ساتھ جنسی زیادتی یا اس کی رضامندی کے بغیر حمل ٹھہرا ہو یا حمل کا سبب بننے والا خاتون کا محرم ہو تو   ایسی صورت میں اسقاط حمل کی اجازت ہے۔

اس قرارداد کے تحت صرف 120 دن تک کے حمل کو گرانے کی اجازت ہوگی اور صرف وہ لوگ ہی اس قانون کے تحت اسقاط حمل کرسکیں گے جو کم از کم ایک سال سے متحدہ عرب امارات میں مقیم ہوں۔

متحدہ عرب امارات کے ایک اعلیٰ عہدیدار نے سرکاری اخبار کے نمائندے کو بتایا کہ ہمیں خواتین، بچوں اور خاندانوں کے تحفظ کے لیے مزید قانون سازی کی ضرورت ہے۔

یہ قرارداد  متحدہ عرب امارات کے صدر اور وزیر اعظم کی توثیق کے بعد نافذ العمل ہو جائے گی۔