امریکی ویزا نہ ملنے پر نیپال کے کھلاڑی سندیپ لامیچھانے ٹی ٹوئنٹی ورلڈ کپ میں شرکت نہیں کر سکیں گے۔

نیپال کی کرکٹ ایسوسی ایشن آف نیپال (سی اے این) نے اعلان کیا ہے کہ نیپال کے لیگ اسپنر سندیپ لامیچھانے امریکہ کے لیے دوسری ویزا درخواست مسترد ہونے کے بعد ٹی ٹوئنٹی ورلڈ کپ میں شرکت نہیں کریں گے۔

اسپنر کو 2022 میں کھٹمنڈو میں ایک نوجوان خاتون کے ساتھ ریپ کرنے کے جرم میں سزا سنائی گئی تھی لیکن اس ماہ کے اوائل میں انہیں الزامات سے بری کر دیا گیا تھا۔

سندیب لامیچھانے نے گزشتہ ہفتے کہا تھا کہ ان کی ویزا درخواست مسترد کر دی گئی تھی اور انہیں 2019 میں امریکی ویزا دینے سے بھی انکار کر دیا گیا تھا لیکن وہ امریکہ اور ویسٹ انڈیز میں ہونے والے ٹورنامنٹ میں شرکت نہیں کر سکیں گے۔

لامیچھانے کو 2022 میں نیپال کے کپتان کے عہدے سے معطل کر دیا گیا تھا اور پولیس نے 18 سالہ خاتون کے ساتھ بدسلوکی کے الزام میں ان کے وارنٹ گرفتاری جاری کیے تھے جس کے بعد انہیں حراست میں لے لیا گیا تھا۔

انہیں دسمبر 2023 میں عصمت دری کا قصوروار پایا گیا تھا اور جنوری میں انہیں آٹھ سال قید کی سزا سنائی گئی تھی لیکن اس ماہ کے اوائل میں نیپال کی ایک اپیل عدالت نے انہیں ان الزامات سے بری کر دیا تھا۔

سی اے این کی جانب سے جاری بیان میں کہا گیا ہے کہ ہم یہ بتانا چاہتے ہیں کہ امریکی سفارت خانہ قومی کھلاڑی سندیپ لامیچھنے کو ورلڈ کپ کھیلنے کے لیے سفری اجازت (ویزا) دینے میں ناکام رہا ہے۔’

یہ 23 سالہ کھلاڑی ہمالیائی ملک سے تعلق رکھنے والے واحد کھلاڑی ہیں جنہوں نے بھارت، آسٹریلیا، پاکستان اور ویسٹ انڈیز کی نمایاں ٹی ٹوئنٹی لیگز میں حصہ لیا ہے۔

انٹرنیشنل کرکٹ کونسل (آئی سی سی) کا کہنا ہے کہ ٹی ٹوئنٹی ورلڈ کپ کے تمام اسکواڈز کا اعلان 25 مئی کی ڈیڈ لائن تک کر دیا گیا ہے۔

نیپالی اسکواڈ میں کسی بھی تبدیلی کے لیے اب آئی سی سی کی ایونٹ ٹیکنیکل کمیٹی کی منظوری درکار ہوگی۔

نیپال ورلڈ کپ میں اپنی مہم کا آغاز 4 جون کو ہالینڈ کے خلاف میچ سے کرے گا جبکہ گروپ ڈی میں اس کا مقابلہ سری لنکا، جنوبی افریقہ اور بنگلہ دیش سے ہوگا۔