سعودی عرب کی حکومت کی جانب سے غیر ملکی حاجیوں میں وطن واپسی سے قبل تحائف کی تقسیم کا آغاز کر دیا ہے۔

سعودی عرب کی وزارت برائے اسلامی امور، دعوت و رہنمائی مکہ مکرمہ میں حج مکمل کرنے کے بعد مملکت سے روانہ ہونے والے غیر ملکی عازمین حج میں تحائف تقسیم کر رہی ہے۔

سعودی پریس ایجنسی کے مطابق یہ تحائف جدہ کے کنگ عبدالعزیز انٹرنیشنل ایئرپورٹ، جدہ اسلامک پورٹ اور طائف انٹرنیشنل ایئرپورٹ پر تقسیم کیے جا رہے ہیں جن میں قرآن مجید کے 6 لاکھ 46 ہزار 652 نسخے اور اس کے معنی کا ترجمہ شامل ہے۔

اپنے وطن کو روانہ ہونے والے عازمین نے سعودی حکومت کی جانب سے فراہم کی جانے والی سہولیات اور خدمات پر ان کا شکریہ ادا کرتے ہوئے کہا کہ استقبالیہ اور الوداعی تقریبات حجاج کرام اور زائرین کے لیے مملکت کی سخاوت کا حصہ ہیں۔

جمعہ سے شروع ہونے والا سالانہ حج بدھ کے روز اختتام پذیر ہوا جس میں اس سال 20 لاکھ سے زائد مسلمانوں نے شرکت کی۔